Frater Guillermus, abbas Morimundi cisterciensis ordinis Lingonensis dioecesis venerabili patri et in Christo nobis praecarissimo coabbati nostro monasterii de Runa ejusdem nostri ordinis Saltzburgensis dioecesis salutem et in commissis fidelem adhibere diligentiam. Inter cetera quae nobis ex officio incumbunt, hoc praecipuum reputamus, ut monasteriorum nobis subditorum indampnitate succurratur, ne ex nostra incuria detrimentum patiantur. Considerantes igitur, quod vita hominis brevis est et mortalis et propter longa spacia a filia nostra venerabili monasterio videlicet sanctae crucis in austria distamus, vobis, de cujus fidelitate et discretione ad plenum confidimus, brevi tenore praesentium vices nostras committimus ad praesidendum in electione novi abbatis ejusdem monasterii, si modernum abbatem obire interim contingat, assumpto vobiscum uno aut duobus abbatibus, quoscunque duxeritis assumendos, cum potestate plenaria providendi in dicto monasterio de novo abbate sive per electionem sive per paternalem provisionem et electionem confirmandi, ceteraque omnia et singula faciendi quae nos faceremus aut facere possemus, si praesentes essemus, statutis ordinis nostri et jure nostro paternali per omnia observatis, tali conditione adjecta, quod infra capitulum generale immediate sequens electus et per vos institutus cum decreto suae electionis et inventario bonorum monasterii sui nobis aut capitulo generali se praesentare habebit; praesentibus per immediate sequens quinquennium in suo robore duraturis. Omnibus et singulis praedicti monasterii regularibus personis firmiter dantes in mandatis, quatenus in praemissis et ea tangentibus vobis tanquam nobis humiliter pareant et devote obediant. Datum in praefato monasterio de sancta cruce in austria sub appensione sigilii nostri secunda die mensis Julii anno domini millesimo CCCC^o septuagesimo.

Source Fulltext: Zisterzienser-Chronik 11 (1899) S. 311-312