Nos frater Himbertus abbas Cistercii, ceterique diffinitores capituli generalis cisterciensis ordinis notum facimus universis, quod in eodem generali capitulo die XIII^a mensis septembris anno domini millesimo quadringentesimo septuagesimo primo apud Cistercium celebrato facta fuit quaedam diffmitio, cujus tenor sequitur et est talis: Abbatibus de provinciis Austriae, Stiriae et Bavariae omnibus et singulis praecipit praesens generale capitulum, quatenus omni anno ante capitulum in unum conveniant ac de nuntio ad capitulum generale mittendo inter se concordent, qui quidem nuntius deferre habeat omnes contributiones ordinis per eas debitas, cui etiam nuntio de expensis sufficientibus provideant omnes et singuli super hoc inter se contribuendo; hujus diffinitionis executionem, ad compellendum videlicet omnes et singulos abbates praemissos ad conveniendum in unum et suas contributiones mittendum ac nuntio praedicto pro expensis contribuendum, abbati de sancta cruce committit in plenaria ordinis potestate, cui etiam pro semel dat authoritatem idem capitulum, omnes et singulas personas ordinis utriusque sexus in foro conscientiae ab omnibus casibus, criminibus et sententiis capitulo generali reservatis in eisdem pronvinciis degentes absolvendi et authoritatem suam, si ipse non possit, aliis communicandi ac pro se confessorem cum simili potestate eligendi. Datum sub sigillo diffinitorum ejusdem capituli anno, die, mense et loco supradictis.

Source Fulltext: Zisterzienser-Chronik 11 (1899) S. 339