Nos frater Hymbertus, abbas Cistercii ceterique diffinitores capituli generalis cisterciensis ordinis notum facimus universis, quod in eodem generali capitulo die XIIII mensis Septembris anno domini millesimo CCCC^o LXXII^o apud Cistercium celebrato facta fuit quaedam diffinitio, cujus tenor sequitur et est talis. Assiduis meditationibus ac matura gravique patrum deliberatione cupiens praesens generale capitulum variis et diversis incommodis, oppositionibus, extorsionibus et inquietudinibus monasteriorum ordinis in commendationibus et aliis violentiis de novo passim emergentibus, maximae in his, ubi patres abbates a monasteriis sibi subjeetis nimium distant aut aliunde propter guerrarum viarumque discrimina, ad ipsa accedere, dum opus est, minime permittuntur, statuendo ac diffiniendo mandat et praecipit in virtute salutaris obedientiae omnibus et singulis patribus abbatibus ordinis, universi, et praesertim filiationem nimis distantem habentibus, aut ad quos tutus non patet accessus, quatenus quo citius fieri poterit, suis filiabus sive monasteriis eis subjectis provideant, de vicinis abbatibus commissariis, ad quos praedicti subditi in necessitatibus suis utpote electionibus, provisionibus ac abbatum institutionibus ceterisque agendis, quae patres abbates aut eorum paternitatem habentes exercere de jure debent, aecessum habeant, dantes eis amplas et validas commissiones ad haec ipsa, quoties opportunum fuerit, facienda cum plenaria ordinis potestate. Mandat quoque nihilominus idem capitulum omnibus et singulis abbatibus ac prioribus conventibusque filiarum, patres suos abbates in||
remotioribus partibus aut in locis et territoriis ab eis inaccessibilibus habentibus, quatenus, si forte ipsi patres abbates ad praemissa negligentes exstiterint, ipsos ad hoc faciendum sollicitent ac obnixe postulent et requirant. Si autem hoc ipsum patres abbates sufficienter requisiti facere neglexerint aut forsitan in territoriis contrariis constiterint, unde nec ipsis ad filias suas nec personis filiarum ad patres tutus pateat accessus, auetoritate capituli generalis ac totius ordinis, quam tenore praesentium confert praesens capitulum, omnibus et singulis filiarum conventibus sic ut praemittitur patres suos pro nutu suo ad necessitatem habere non potentibus, ut liceat ipsis aliquem vel aliquos vicinum vel vicinos abbatem vel abbates ad suis electionibus praesidendum aut alios actus patrum abbatum exercendum vocare, eosque in ipsis electionibus et aliis actibus tanquam patres suos abbates proprios habere et admittere, sie tamen quod non in contemptum patrum abbatum aut eorum praejudicium sed sola necessitate cogente et ad obviandum periculis, quae propter nimiam moram et patrum abbatum longam expectationem vel absentiam contingere solent. Hoc fecit decernitque praesens capitulum, omnes electiones, provisiones et promotiones ceterosque actus patrum abbatum legitimos jus et efficaciam habere proinde ac si per proprios patres abbates fuissent rite facta et perpetrata. Datum sub sigillo diffinitorum ejusdem capituli; anno mense, die et loco supradictis. Praescriptam igitur nostri generalis capituli diffinitionem sub sigillo diffinitorum nos frater Johannes abbas ad sanctam trinitatem in nova civitate et integram vidimus, contrectavimus, legimus atque cum originali collationavimus, exindeque ad instantiam Reverendi patris ac domini domini Georgii abbatis sanctae crucis praesens transsumptum fieri et nostri jussimus sigilli appensione roborari. Acta sunt haec in monasterio Campililiorum die nona mensis martii, anno domini millesimo CCCC^o LXXIII.

Source Fulltext: Zisterzienser-Chronik 11 (1899) S. 340-341