Frater Georgius abbas monasterii sanctae Crucis in Austria, cisterciensis ordinis, Pataviensis diocesis venerabilibus in Christo patribus ac d. d. abbatibus universis et singulis ejusdem ordinis Salzburgensis et Pataviensis diocesis, insuper prioribus, subprioribus, bursariis, celerariis, officialibus, conventualibus ac loca eorum tenentibus quibuscunque. Salutem ac in domino sinceram caritatem ac mandatis nostris imo verius ordinis ac capituli generalis cisterciensis et ordinationibus apostolicis firmiter obedire. Venerabiles in Christo patres ac domini ceterique in Christo sincere dilecti, vestris praestantissimis paternitatibus luce clarius constare non ambigimus, tam ex constitutionibus apostolicis quam etiam superiorum et generalis capituli diffinitionibus, unumquemque vestrum sub gravibus et formidabilibus poenis ac censuris in eisdem statutis et diffinitionibus multipliciter sancitis obligari, ad generalia ordinis studia scolares aptos et dispositos cum provisionibus competentibus certis in eisdem temporibus destinare; quod tamen a nonnullis vestrum hactenus nimis negligenter extitit observatum, in gravem contemptum et vilipendium statutorum ordinis praemissorum; et quoniam quidem a primaeva studii Wiennensis fundatione collegium s. Nicolai ibidem a serenissimis principibus Austriae ordini nostro ad singularem honorem et personarura utilitatem collatum fuit ac nobis abbati in sancta cruce plenaria auctoritate ordinis et capituli generalis tamquam ordinario visitatori perpetuo subjectum, quoad ejus gubernationem, dispositionem et omnimodam directionem cum potestate plenaria compellendi per censuras ordinis omnes et singulos abbates, qui ab antiquo illuc suos scolares mittere consueverunt, de cetero ibidem mittendi et continuandi, prout in literis et diffinitionibus antiquis desuper confectis clarius continetur, in quibus tamen certis et duobus (?) ex causis animum nostrum moventibus hactenus per nos indulgentius est processum. Notantur ex eo, quod dominum doctorem provisorem modernum intelleximus remissum fuisse, et circa supposita et in pluribus aliis reprehensibilem. Sed quia idem provisor nunc per dominum abbatem suum de Fonte salutis remotus est et nos scriptis ejusdem certificati, quod ipsum omnino officii provisoratus involvere nolit, unde nobis collegium cum cura sua ut prius ab antiquo ex ordine committitur. Ne igitur ipsum collegium ab ordine alienetur, sed secundum formam ordinis cum scolaribus inhabitetur, nos auctoritate plenaria atque ordinaria superiori mandato, ut tenemur, obedire et obsequi cupiens, provisione ordinaria ejusdem collegii jam facta, provisoreque ydoneo nostro de conventu illuc posito, de cujus advertentia quoad vestrorum filiorum honestam conversationem ac studiorum incrementa haud omnino solliciti imo certissimi sumus. Idcirco vos omnes et singulos venerabiles in Christo patres abbates ac dominos monasteriorum et videlicet de Sancta Trinitate in nova civitate, de Novomonte, de Runa, de Sitich, de Victoria, de Campoliliorum, de Valle Dei, de Paumgartenberg, de Hilaria, de Cella angelorum, de Cella principum, de Raytenhaslach, de Alderspach, de Cella Dei et de Zwetla et quemlibet vestrum specialiter, quibus vel cui praesentes nostrae literae fuerunt exhibitae, aut in quorum monasteriis et habitationibus legitime fuerunt intimatae ea quae decet reverentia requirimus et debita cum instantia monemus ac in virtute salutaris obedientiae districte praecipiendo mandamus, quatenus scolares vestros cum bursis et provisionibus debitis aut duplum expensarum a d. Benedicto papa XII^mo taxatarum infra triginta dies post insinuationem praesentis immediate sequentes, quorum decem pro primo, decem pro secundo, reliquos decem pro tertio et peremptorio termino assignamus, effectualiter ad praedictum Wiennense Studium dirigatis prout ex saepedictis statutis tenemini; alioquin praedictis triginta diebus tanquam termino canonicae monitionis elapsis, vos et quemlibet vestrum, qui se in praemissis negligentem reddiderit, ex nunc prout ex tunc et ex tunc prout ex nunc a divinis suspendimus et suspensos in his scriptis declaramus; in qua suspensione, si animo obdurato perstiteritis, aut aliquis vestrum perstiterit, per quindecim dies, immediate praedictos triginta dies sequentes, quorum quinque pro primo, quinque pro secundo, reliquos vero quinque pro tertio et peremptorio termino assignamus, vos omnes et singulos, qui hujusmodi nostrae monitionis et mandati, imo verius totius ordinis ac papalium statutorum contemptores exstiterint, vel eum, qui contemptor exstiterit, ex tunc prout ex nunc et ex nunc prout ex tunc excommunicamus in Dei nomine in his scriptis ac excommunicatum et ab omnibus in divinis et ex ... diligentius evitandum publice denuntiamus, mandantes nihilominus auctoritate qua super omnibus et singulis prioribus, subprioribus, bursariis, celerariis, officialibus et conventualibus monasteriorum praedictorum sub eisdem suspensionis et excommunicationis poenis, quatenus abbates ad obediendum mandatis nostris secundum ordinis statuta in mittendis scolaribus diligenter inducant, requisiti etiam hujusmodi nostros processus fideliter insinuent, contradictores post lapsum cunctorum in hoc nostro processu contentorum in divinis et ex ... ubique devitent, donec aliud a nobis aut a domino cisterciensi habuerint in mandatis. Ceterum praesentium bajulum et exhibitorum harum ... literarum nostrarum omnibus et singulis Christi fidelibus, praesertim personis ordinis sinceriter in domino recommendamus, mandantes vobis dominis abbatibus in praemissis expresse et specifice nominatis, quatenus eidem in viae et vitae necessitatibus ac salario congruenti prout ratio secundum locorum distantiam dictaverit, providere curetis; certificantes nos et per eundem de ipsius diligentia et vestra bona voluntate in omnibus ante dictis sub poenis et censuris superius fulminatis. Absolutionem vero omnium et singulorum, qui se in praemissis negligentes reddiderunt et ob id censuras inciderint, nobis vel domino cisterciensi reservantes et scriptis praesentibus reservamus. In quorum omnium et singulorum fidem, robur et testimonium praesentibus sigillum nostrum abbatiale majus duximus appendendum. Datum in nostro monasterio sanctae crucis ultima die mensis Novembris anno domini millesimo quadringentesimo septuagesimo quinto.

Source Fulltext: Zisterzienser-Chronik 12 (1900) S. 92-94