Wier Chůnrat an dem Harmarkcht der Richter, Chv^oenrat der Polle der Purgermaister, vnd der gemainrat von der Stat ze Wienne veriehen vnd tv^oen kvnt allen, die disen brief gesehent oder geho^erent, daz die erbern læut weilen Her Ernst, vnser burger, vnd ver Gerdro^evt sein hovsvrowe, da si baide lebten vnd wol mahten, einen hof datze Swechent mit gemainem rate und gv^oetleichen willen schv^oeften den vrowen datze sant Nycla und ierem Conuent ewichleich nah ier baider tot durch ier sele willen. Da si dv baide tot gelagen, der vorgenant Ernst vnd ver Gerdrovt sein housvrowe, da cho^emen vvr vns ier baider svne, der Jacob vnd der Hainreich, vnd ier aidem, der Hainreich vnd der Walther, vnd bestætigen daz geschæfte vmb den vorgenanten hof vor vns vvr sich vnd vvr alle ier geerben also, daz der hof mit allem dem, daz darzv^oe geho^ert, den vorgenanten vrowen ewichleichen dienen schol. Darvmbe ze einen v^orchvnde des geschæfftes und der stætigunge des vorgenanten hoves geh wier disen brief mit vnserr stat insigel. Des sint gezevg, Her Reinbot der Zeleub der hv^oebmaister, her Greiff ouf der Stetten, her Vlrich der Rvkchendorfer, her Jacob von Hoyen der Lantschreiber, her Pilgreim der Chrigler, her v^olman an dem Witmarcht, her Paltram der Vatz, her v^olreich vnder der Louben, her Hainreich der Hansgraf, her Hainreich der Smit, vnd ander leut ein michel tail. Daz ist geschehen nah vnsers herren gebv^oerd tousent iar vnd zwai hvndert iar vnd næun vnd ahtzich iar.

Source Fulltext: WEIS, Heiligenkreuz (=FRA II/11, 1856) S. 320-321