Ich Otte der Floit von wettkeindorf vnd ich Hadmar der Floit, des vorgenanten Otten svn vnd ich Georig der Floit, des vorgenanten Otten veter vnd ich Margret, der vorgenanten Floiten niftel vnd ich Hertneid ir wiert, vergehen an disem brif vnd tuen chunt allen den, di in ansehent oder horent lesen, di nu lebnt vnd hernach chvnftich sint, daz wir mit gvetem willen vnd mit vnser vrevnt rat, ze der zeit, do wir iz wol getven mahten, habn gegeben den vrowen von sant Nicla dem chloster, daz da leit bei Wienn, zwai lehn ze dem Gebneins, di dienent dreizehn schilling vnd nevn ches, vnd einen metzen waitzes vnd ze dem Pirichech vierzich phenning vnd drev hvener von vberlent echern vm zwai vnd zwaintzich phvnt wienner phenning, vnd sein avch der reht vnd redlich gewert. Wier haben avch daz vorgenant guet ze dem Gebneins vnd ze dem Pirichech gegeben den vorgenanten vrowen von sant Nicla ze rehtem aigen vnd sein sein rehter scherm, als aigens reht ist vnd des landes reht ist ze Osterrich for alle ansprach. Vnd daz dirr chovf vnd diser gewerft vnverwandelt sei vnd vntzebrochen, darumbe geb wir, ich der vorgenant Otte der Floit vnd ich Hadmar der Floit, der vorgenant vnd ich Georig der Floit, avch der vorgenant, vnsrev insigel an disem brief ze einer ewigen bestetigvng. Des ist gezevch her Nicla der Chriech von Alse, her .... Greif hern Otten sun, her Chvnrat an dem Harmarcht, der ze den zeiten Hvebmaister was, her Vlreich bi den brvedern, hern Chvenn svn, her Hainreich der Chriech vnd sein brveder Vlreich, Jans von Simening, Herbort sein brveder, Nicla der ivnge Chriech vnd ander frvm levt gnvech, den disev sach wol chvnt ist. Der brief ist gegeben dv nach Christes gepverd ergangen warn drevzehn hvndert iar vnd dar nach an dem vierdem iar, an vnser vrowen tach ze der Liehtmesse.

Source Fulltext: WEIS, Heiligenkreuz (=FRA II/16, 1859) S. 403-404