Ich Heinrich der Vrbatsch vnd ich Katrei sein havsvrowe, wir veriehen vnd tvn chvnt allen den, die disen prief lesent oder horent lesen, die nv lebent vnd hernah chvnftich sint, daz wir mit vnser erben gvtem willen vnd gvnst, mit verdahtem mvte vnd mit gesamter hant zv der zeit, do wir iz wol getvn mohten, verchavft haben vnsers rehten grvntrehtes, Zehenthalben wienner phenninch geltes grvntrehtes, die man alle iar dient an sand Jergen tage vnd der vier phenninge geltes ligent avf Marchartes havse des Chramer, daz da leit an dem Chienmarchte in dem Revelgezzelein, vnd ligent ir sechsthalben phenninch geltes avf Heinriches havs des Scharsaher, daz da leit in der Langenmavre. Die selben gvlte haben wir verchavft vnd geben mit allem dem nvtz vnd reht, als wir si in grvntrehtes gewer her praht haben, vmb achzich phenninge wienner mvnze, der wir reht vnd redlichen gewert sein, den erbarn swestern, swester Chvnigvnden, zv den zeiten Apttissinne vnd der Samnvnge gemaine des Chlosters sand Nichlas avzzerhalben vnd innerhalben der Stat ze Wienne vnd allen irn nahchomen ledichlichen vnd vreilichen ze haben, vnd allen irn frvmen da mit ze schaffen, verchavffen, versetzzen vnd geben, swem si wellen an allen irresal, vnd dar vber durh pezzer sicherhait so setzen wir vns, ich Hainrich der Urbatsch vnd ich Katrei sein havsvrowe, vnverschaidenlichen swester Chvnigvnden, der Apttissinne vnd der Samnvnge gemaine des chlosters sand Nichlas avzzerhalben vnd innerhalber der stat ze Wienne vnd allen irn nahchomen vber die vorgenanten zehenthalben phenninge geltes grvntrehtes zv rehtem scherm fvr alle ansprah, als grvntrehtes reht ist, vnd der Stat reht ze wienne, vnd geben in dar vber disen prief zv einem vrchvnde vnd ze einem gezevg, versigilt mit vnserm insigil, vnd sint avh gezevg her Otte der Wulfleinstorfer, zv den zeiten purgermaister ze Wienne, her Herman von Sand Polten, zv den zeiten rihter ze wienne, her Heinrich der Chrannest, her Niclas von Ezlarn, vnd ander frvme levte genvch. Diser prief ist geben ze wienne, do von Christes gebvrt waren ergangen drevzehen hvndert iar, in dem Nevnzehenten iar dar nah, des næhsten Mittichens vor sand Cholmans tage.

Source Fulltext: WEIS, Heiligenkreuz (=FRA II/16, 1859) S. 406-407