Wir Swester Katrey die Pentzinner zu den zeiten Aptessinne in Sande Niclas chloster ze wienne vnd der Conuent gemain da selbens verichen offenleich, daz wir mit gutem willen vnd mit verdachtem mvt vnd mit gemainem rat, zu der zeit, do wir ez wol getun mochten, recht vnd redleichen aufgeben haben dem chloster vnser vrowen datz dem Heyligen Crevtz die aygenschaft, die wir gehabt haben auf sechs schilling wienner phenning gelts, di do ligent datz Schrikche auf vberlent ekchern also, daz der apt do selbens datz dem Heyligen Chrevz vnd alle sein nachomen der vor geschriben ekcher mit alle dev vnd dar zu gehort furbaz Stifter vnd Storer schuln sein in allem dem rechten, als von des selben gu^ets Stifter vnd storer gewesen sein, vnd schuln auch wir, noch alle vnser nachomen vmb die vorgeschriben aygenschaft furbaz gen in, noch gen irm gotshaus dchain ansprach noch vodrung nimmermer gehaben, noch gewinnen, weder wenich noch vil. Vnd des ze vrchunde geben wir dem vorgenanten vnsern Vrowen chloster daz dem Heyligen Chrevz disen brief ze einem offen vrchunde, versigilt mit vnsern insigiln. Der brief ist geben ze wienne nach Christs geburde dreutzehen hundert iar, dar nach in dem acht vnd virzigistem iar des nasten Samztags nach sande Mertteins tag.

Source Fulltext: WEIS, Heiligenkreuz (=FRA II/16, 1859) S. 407-408