Ich Hainreich der Sneyder von Atzkestorf vnd ich Elzbet sein Hausvrow vergehen vnd tun chunt allen den, die diesen brief lesent oder hôrent lesen, daz wir mit vnser erben gutem willen vnd gunst, mit verdachtem mût vnd mit gesampter hant, zu der zeit, do wir es wol getûn mochten vnd mit vnsers grunthherren hant, des erbern gaistleichen Herren pruder Albrechts, zu den zeiten Prior ze Maurbach ze aller Heyligen tal, des Ordens von kartus, recht vnd redleic, verchauft vnd geben haben vnser wisen, gelegen ze Hedrestorf vnder dem Purgleins, die mich obgenanten Elzbeten anerstorben ist, von vater vnd von mûter, den got gnade, vnd auch mir mit furzicht vnd mit lozz geuallen ist gegen mein geswistreiden vnd geswistreid chinden, mit alle dem nutze vnd rechten, alz wir dieselben wisen in purchrechts gewer herpracht haben, da man alle iar von dient den erbern gaistleichen heren ze Maurbach zwai hûner ze gruntrecht an sant Michels tag vnd nicht mer, vmb funfthalb phunt wienner phening, der wir gar vnd gentzleich gewert sein, den erbern geistleichen vrown Swester Annen der Vruarerinne, ze den zeiten aptessinne vnd dem Conuent gemain datz sant Niclas ze wienne vnd irn nachchomen furbas ledichleich vnd vreyleich ze haben vnd allen irn frumen da mit ze schaffen, verchauffen, versetzen vnd geben, wem si wellen an allen irresal. Vnd sein auch wir vnd vnser erben unuerschaidenleich der vorgenanten wisen ir recht gewern vnd scherm fur alle ansprach alz purchrechts recht ist vnd des Landes recht ze Osterreich. Wer aber, daz furbaz mit recht an derselben wisen icht chriegs oder ansprach gewunnen, von wem das wer, was si des schaden nement, das suln wir in alles ausrichten vnd widercheren an allen irn schaden, vnd suln si das haben auf vns vnuerschaidenlich vnd auf allem vnserm gut, das wir haben in dem Lande ze Österreich, wir sein lebentich oder tod. Vnd das diser chauff furbas also stet vnd vnzerbrochen beleib, vnd wand wir selber nicht aigens insigels haben, darumb so gebn wir in disen brief zu ainem warn vrchund diser sache versigilten mit des Gruntherren insigil, des vorgenanten Hern Albrechts, Prior ze Maurbach, im vnd denselben Gotzhaus an schaden vnd mit Hern Jacobs insigil des Cherpokchen, die wir des vleizzichleich gepeten haben, das si der sache gezeug sint mit irn Insigiln. Der brief ist geben ze Wienne nach Christs gepurt dreutzehen hundert iar, darnach in dem vier vnd sechtzigistem iar an sant Vrbans tage.

Source Fulltext: WEIS, Heiligenkreuz (=FRA II/16, 1859) S. 411-412