Wir Wilhelm vnd Albrecht geuettern, von gots genaden Hertzogen ze Österreich, ze Steyr, ze Kernden vnd ze Krain, grauen ze Tyrol etc. Bekennen für vns vnd vnser erben vnd nachkomen. Als .... Hochgeborn Fürst, vnser lieber Herr Vetter vnd Vatter, Hertzog Albrecht seliger, dem got genad, von den geistlichen frawen vron datz Sand Niclas auzzerhalb vnsrer Stat hie ze Wienn vor ettleichen iarn hat gekaufft das haus mit sampt dem Gotshaus vnd der Cappelln in der Synger strass, vnderhalb der Tewtschen Herren gelegen daselbs hie ze Wienn, zu ainer gemeiner schul der heiligen Schrifft graven Orden, vnd dafür er denselben geistlichen klosterfrawen hat gegeben vnd geschafft fümftzig phunt phenning ewigs gelts, darumb er sy auch geweist hat auf vnser ampt zu Gmunden, nach seines briefs sag, den sy darüber habent: Also haben wir, angesehen desselben unsers herren Vetters vnd Vaters stifftung vnd seinen gotlichen vnd gerechten fürsatze, vnd haben dertzu^e vnsern gunst vnd willen auch gegeben vnd bestetten auch den egenanten klosterfrawn vnd irm Gotzhaus vnd irn nachkömen datz Sand Niclas des egenanten vnsers Herren Vettern vnd Vatters seligen brief wissentlich vnd mainen vnd wellen, daz der fürbasser bey seinen krefften gentzlich beleib, vnd daz ain yeglicher vnser amptman ze Gmunden der egenanten klosterfrawen die obgenante gült alle iar zu zwain Teiln, das ist, auf Sand Jörgen vnd auf Sand Michels tag auf yetweder zeit, fümf vnd zwaintzig phenning fürderlich geb vnd auzrichte, nach irs briefs sage, vnd des nicht lasse. Ob aber die vorgenant schul nicht wurd gehalten, als sy geschikt ist oder daz man sy an ein ander stat legte, vnd das wir den egenanten klosterfrawen das haus sampt dem Gotzhaus und der Capelln in der Synger Strass wider geben, oder ob wir die vorgenante gult mit fümfhundert phunden phenning ablösten, des wir gewalt haben nach des vorgenanten irs briefs lautt, so sullen wir vnd vnsere erben derselben fümftzig phunt gelts ledig vnd los sein an geuerd. Mit vrkund ditz briefs. Geben ze Wienn an Mittichen vor dem heiligen tag ze Phingsten nach Kristi geburd Drewtzehenhundert Jar, darnach in dem Sechs vnd newntzigisten Jare.

Source Fulltext: WEIS, Heiligenkreuz (=FRA II/16, 1859) S. 422-423