Wir Fridrich, von Gotes gnaden Romischer ku^enig, zu allen czeiten mere^ar des reichs, herczog ze O^esterreich, ze Steyr, ze Ke^arnden und ze Krain, graf zu Tyrol etc., bekennen und tu^en kund offentlich mit dem brief, daz wir diemu^eticlich von wegen der ersamen geistlichen unser lieben andechtigen .. der abbtessinn und convents zu sand Nicla, ausserhalb unserr stat hie zu Wienn gelegen, angeru^eft und gepeten sein, daz wir in alle i^ere privilegia, gnad, freiheit und gu^ot alt herkomen und gewonheit, die irn vorde^arn, in und i^erem gotshaus daselbs zu sand Nicla von unsern vorvordern herczogen und lanndesfu^ersten in O^esterreich etc. gegeben, verlichen, vernewet und beste^att we^arn, auch gne^adiclich zu vernewen, zu beste^atten und zu bevesten geru^ochten. Haben wir angesehen solich ir diemu^etig bete und haben in und iren nachkomen dadu^erch und durch unser und unserr vorvordern und nachkomen seel heil willen und von sundern gnaden dieselben ire privilegia, gnad, freiheit und gu^ot alt herkomen und gewonhait, die si lo^eblich herpracht haben, als herr und landesfu^erst in Osterreich etc. und vormund unsers lieben vettern kunig Lasslawen bestett, bevestnet und vernewet, beste^atten, bevestnen und vernewen in und iren nachkomen die auch in kraft diczs briefs, was wir in zu^o recht daran beste^atten sullen oder mugen in allen irn puncten und artickeln zu^e gleicher weis, als ob die von wort zu^o wort in dem gegenwu^orttigen brief begriffen und geschriben we^arn, und mainen, seczen und wellen, daz die hinfu^er ewiclich bey allen i^ern kreften beleiben und von ne^aniclich gehaltten und dieselben ebbtessinn, convent, ir gotshaus und ir le^aut und gu^eter von niemand dawider su^ellen beswe^aret noch beku^emert werden in dhein weg. Davon gepieten wir vesticlich unsern lieben getrewen .. unserm gegenwu^erttigen lantmarschalch in O^esterreich oder wer ye zu zeiten unser lantmarschalch da sein wirdet und allen unsern hauptle^auten, herren, rittern und knechtten, phlegern, burkgraven, burgermeistern, richtern, re^aten, mauttern, czollne^arn und allen andern unsern ambtle^auten, undertanen und getrewen, geistlichen und weltlichen, edeln und unedeln, wie die genant sein, und sunderlich den erbern weisen unsern lieben getrewen .. dem burgermeister, .. richter, dem rat und .. den burgern hie ze Wienn, gegenwu^erttigen und kunftigen, und wellen ernstlich, daz si die obgenanten ebbtessinn und convent, dasselb ir gotshaus zu sand Nicla und ir le^aut und gu^eter bey solhen iren gnaden und freiheiten in von den vorgemelten unsern vorvordern gegeben und dis unser beste^attung lassen bleiben und in daran kein inve^all noch i^errung tu^on noch des yemand andern ze tu^on gestatten in dhein weg, sunder si dabey von unsern wegen hanthaben und schirmen vor allem gewalt und unrechtten. Welich aber dawider te^aten, die wissen sich swe^arlich wider unser huld und gnad getan haben.||
Mit urkund des briefs, geben zu Wienn an montag nach sand Antonien tag, nach Kristi gepu^erd vierczehenhundert jar und darnach in dem fu^emfundvierczigisten jar, unsers reichs im fumfften jar.