Wir Albrecht, von Gotes gnaden herczog ze Osterreich, ze Steir, ze Ke^arnden und ze Krain, markgrave ze Me^arhern und grave zu Tirol etc., bekennen von der zwayung wegen, die gewesen sind zwischen den geistlichen frawn, .. der abttessinn und dem convent datz sant Niclas vor Stubentor hie ze Wienn, anstat junkfrawn Annen, irer conventswester, weilent Stephans des Langen, unsers burger ze Wienn, tochter ains tails und unserm getrewn Hawnolten dem Schu^echler anstat des yetzgenanten Langen weltleichen erben, der gwalt er het, des andern tails umb die nachgenanten stukh und gu^eter, die des egenanten Stephans des Langen sind gewesen, und umb die nucz, die unczher davon gevallen sind. Derselben zwa^eyung si zu baider seitt willicleich und an ausczug hinder uns gegangen sind und gelobt habent, ste^atzehalten, was wir zwischen in darumb sprechen, daz wir wolbede^achtleich und mit gu^oter vorbetrachtung zwischen in auzgesprochen haben und sprechen auch wissentleich mit dem brief, als hernach begriffen ist.||
Des ersten sprechen wir, daz die viertzehen re^ahel weingarten genant die Wispewnt, item drew re^ahel am Hertzogenperg und zway re^ahel im Gere^awt ze Berchtoltzdorf und ain weingarten genant der Tyernawer, am Nusperg gelegen, sullen den obgenanten frawn zu sant Niclas und i^erm gotzhaus mit aller irer zugeho^erung, als si von alter sind herko^emen, ledicleich gevallen, allen i^ern frumen damit ze schaffen, wie in das fu^ogsam ist, und sullen in .. der Hawnolt und des Langen erben kain irrung daran tu^on, weder vil noch wenig, in dhain weg, ungeve^arleich. ||
Darnach sprechen wir, daz das haws ze Berchtolczstorf und die setz daran, der zway re^ahel sind, mitsambt dem dienst, so man in dasselb haws dienet, item ain re^ahel dabey, item zway re^ahel im obern Viechpartz, item zway Re^ahel im undern Viechpartz, item drew re^ahel im Zukhenmantl ze Berchtoltstorf gelegen sullen mit allen i^ern zu^egeho^erungen, als si von alter sind herko^emen, dem Hawnolten und des egenanten Langen weltleichen erben ledicleich gevallen, dahin si dann durch recht gevallen sullen, und sullen in die obgenanten geistleichen frawn auch kain irrung daran tu^en an gever.||
Item umb das gelt, das auzsteet von der nucz wegen, wellen wir hinfur auzsprechen. Darnach sprechen wir, welher tail den gegenwurtigen unsern auzspruch uberfur in ainem oder menigen stukhen, das wissentleich gemacht wurd, der sol gen dem andern tail all sein gerechtikait in den sachen verlorn haben und uns ze peen vervallen sein sechshunde^art guldein, und des zu urkunt geben wir yedem tail unsern spruchbrief in geleicher lautt.||
Geben ze Wienn an phincztag vor sant Jacobs tag, nach Kristi gepu^erde viertzehenhundert jar, darnach in dem drewunddreyssigisten jar.