Ich Perchtolt der Ponhalm vnd Liutolt der Stainrevter vnd vnser erben vergehen vnd tuen chuent allen den die den brief sehent oder hoerent lesen, Daz wir Chunrat dem heubler purger ze Stain vnd allen sein erben lozzen haben das haus auf dem plintperg vnd den gartlen vnd swas zu dem haus gehoert zu aim rechten erb, daz si daz zimern vnde pawen sullen vnd sullen vns alle iar do von dienn zway pfunt pfenning wienner an sant Dirtrams[?] tag nach purchrechtz reht vnd sullen auch daz purchreht von dem selben haus vnd garten an allen vnsern schaden alle iar raichen vnde dienn gein Dirnstain zwelf pfenning vnd ain pfenninch von dem garten an der Jaensinn[?]. wir sullen auch vnsern gemach in dem lesen haben in dem haus mit vnserm gesind vnd pferden vnd wein fur vns dez not ist. Daz daz alsa stat vnd vnzerbrochen behalten werd, geb wir ped Perchtolt ponhalm vnd vnd [sic] Liutolt Stainreuter fur vns vnd vnser erben den brief versigelten mit vnsern anhangenden insigeln vnd zv ainer gueten geziuchnusse mit Chunratz dez Sevelder insigel zu der zeit perchmaister in an schaden. Daz ist geschehen do man zalt von Cristus gepuert dreuzehenhundert iar vnd in dem vier vnd funftzichistem iar an sant Pauls abent als er bechert wart.