Quoniam acta humane condicionis nonnunquam per interualla temporum obliuionis errore fuscantur, expedit ea scripturarum indiciis in Christo regeneratis atque regenerandis ad memoriam reuocare. Hinc est quod nos Ortolfus Dei gracia prepositus ecclesie Sancti Georii in Herzogenburch, peticiones Wolflonis de Wylanstal famuli nostri concurrente assensu et bona voluntate nostri capituli admisimus, compaciendo eidem, quod decimam sitam in Augea, quam non ex iure aliquo sed ex gracia ab ecclesia nostra tenuit, Domino Ottoni militi dicto de Traysma, viro honesto et discreto, ad decem annorum terminos obligauit, accepta pecunia sex talentorum wienensium, condicione tali interposita, ut transactis decem annorum temporibus, prefata decima omni controuersia et instancia que poterit ab ipsis scilicet Domino Ottone et Wolflone uel ab eorundem heredibus suboriri exclusa penitus et semota, ad ecclesiam nostram commode et libere reuertatur. Super hiis congestis presentem cartulam in testimonium et cautelam sufficientem, prefato Domino Ottoni militi damus nichilominus eam sigilli nostri munimine roborantes, testium vero nominibus subnotatis. Testes autem sunt Dominus Mingotus de Retelperg. Hainricus et Chunradus fratres de Reucholsperg. Fridericus Velbingarius et Hermannus frater suus. Chunradus de Gozinsdorf. Albertus de Gozeinsdorf. Fridericus de Gaul. Reinbertus et frater suus Yrnfridus de Retelperg et alii quam plures fidedigni. Acta sunt hec anno Domini M°. CC°. LXXXII°. Datum apud Herzogenburch. cum perceptione prima proventuum. In die beati Cholomanni martiris. hoc est III.° idus Octobris.

Source Fulltext: FAIGL, Herzogenburg (Wien 1886) S. 9-10