Ich Weigant der Eisenpeutel von dem Chogel vergich vnde tuen chunt allen den die disen Brief lesent, sechent oder horent lesen den die nu lewent, oder hernach chunftich werdent, daz Fridereich der Fizlinger mit seinem guet wider mich chaufte, vnde geworifen hat ain lechen datz Nider Winden pai der Traisem in Hertzogenburiger Pfarre vmwe sibenunde dreizzich phunt phenninge wienner Munizze, der ich schon vnde gentzleich verrichte vnde geweret pin, vnd daz lechen dient an sande Michelstage ain halbes phunt phenninge mit allen dingen, vnd czwey vnde dreizzich phenninge auf reut ekcheren, vnde viertzechen leuchhart akcheres die tzue dem selben guet gehorent, vnde han ich vorgenander Weigant die aigenschafte des selben lechens sande Georigen Gotshaus datz Hertzogenburch, vnde Brobest Wolfkeren tzu den tzeiten vnde alle der Samenunge vreileich vnde ledichleich durich Got gegewen mit allem dem recht, vnde ich die selben aigenschafte vnde mein voderen gehabet haben, also mit weschaidener rede daz er der vorgenande Brobest Fridereichen dem Fizlinger daz vorgenande lechen gelichen hat tze rechtem purchrechte, daz er dem vorgenanden Gotshaus datz Hertzogenburch alle lar an sande Georigen tage dien tzwen phenninge tzue ainem vrchunde, vnde ist auch daz geschechen mit meinem verdochtem muet vnde mit guetem willen meiner hausvroen, veren Tueten, vnde meiner sune Nyclas vnde Weigandes vnde auch aller meiner erben vnde sol auch ich der vorgenande Weigande der Eysenpeutel dem vorgenanden Gotshaus datz Hertzogenburch vnde mein vorgenande sune Nycla vnd Weigant die aigenschafte freien vnde schermen, vnd alle meine erben mit sampt mier vnde nach mier nach rechtem Landes recht vnde gewonhait in Osterreich. vnde daz dise rede stet vnde vntzebrochen weleibe von mir vnde von allen meinen erben des gibe ich der vorgenande Weigande der Eysenpeutel von dem Chogel dem vorgenanden Gotshaus datz Hertzogenburch disen Brief tzue ainem steten gezeuge, vnde tzue ainem offenen vrchunde versigelet mit meinem aigenem Insigel, vnde sinde auch nach meiner pete diser rede vnde dieser sache die erberen Herren getzeuge mit ier aigenen Insigelen Her Chunrade von Arenstain mit seinem Insigel. Her Gundakcher von Retelperige. vnde her vlreich der Kerenberiger von Guetenprunne mit ier Insigelen. Her Ortolfe von Atzenprukke mit seinem Insigel. vnde sinde auch one Insigel getzeuge. her vlreich vnde her Dittreich die puechperiger von Wazzerberch. her eberan von Ernsprunne. her Herwort von Wielantstal. her alber vnde her wernhart von Gotzesdorf. alram abe dem perige. Leutolden von ainode. Otte der Traismer. Cholhoch von Alaren. Herlibe von Purchstal. Ruger von etzleinsperige. vnde ander frum leut die pai der rede gewesen sinde. vnde ist der prief gegeben vnde die sache geschechen da von Christes gepuerde woren ergangen dreytzechen hundert lar. vnde darnach in dem Ochtem lar an vnser vroen tage in der vasten.

Source Fulltext: FAIGL, Herzogenburg (Wien 1886) S. 33-34