WIER Gvndakcher vnd Wernher Hern Wernhers Sven des Payger von Russpach tuen chunt allen den die disen prieff an sehent. oder lesen horent die nv lebent oder her nach chvnftig sind, daz wier mit vron chunigunden, vnser vrowen vnd vnserr mveter gepet vnd ovch mit ier rat vnd ovch mit gemainem rat aller vnserr pesten frevnt vnd gvetleichem willen aller vnserr geswistreit vnd erben haben gegeben dem Gotshovsse des gveten sand Jorgen ze Hertzogenburch vnd Probst wolfkern ze den zeiten, vnd alle der samnung dez Gotshovsse niderthalb Sand Jorgen pei der Tvenaw da weilen ier chloster der selben samnvng ist gelegen, Pannse pei der Tvenaw vnser gvet vnd vnser rechtes aygen, waz wier da gehabt haben ovf dem lant vnd in der Tvenaw, hofstet vnd ekcher vnd wismad vnd holtz vnd pavmgarten vnd ovch dev Chappeln dez selben aygens, vnd waz dar zve gehoert ze veld vnd ze dorff allen vnsern vordern seln ze hilf vnd ze Trost vnd ovch dvrch zwaier vnserr geswistreit willen dev sich in Gotes lieb in das vorgenant gotshovsse habent wegeben, got dar inne ze dienen, vntz an ier paider toet, vnd haben daz vorgenant gvet dem vor gescriben gotshovsse vnd der samnvnge ledichleich gegeben ze rechtem aygen also wier iz vnd vnser vordern gehabt haben dez selben gvetes schol ovch vnser Herre der Hertzog in Oesterreich fogt sein vnd wo der samnvng des gotshovsse dvrfft geschiet vmb daz gvet vor geriht so schulle wier dez selben gvetes ier scherm vnd gewer sein fuer alle ansprach nach landes reht in Oesterrich nem die samnvng vnd daz gotshovsse dar vber schaden mit reht an dem gvet, den selben schaden schull wier Gundakcher vnd Wernher die vorgenannten der samnvng vnd dem gotshovsse volchleich vnd gentzlich pezzern vnd abtven vnd ovch deu arbait vnd deu chost deu in dar ovf get, wer auer wir niht, so schullen vnser Ovchem Gvndakcher vnd Hainreich dez vorgenanten gotshovsse vnd der samnvng gewer sein vnd ovch laisten waz wier gelobt haben. Daz dev red stet vnd vnverchert weleib von vns vnd von allen vnsern frevnten vnd erben Geb wier dem gotshovsse vnd der samnvng disen prief versigelt mit des erbern Herren insigel vnd vnsers frevndes her Albero von Chvnring vnd mit vnser paider insigel vnd ovch mit vnser vorgenanten Ovchem paider insigel. Dez sind gezevich erber Herren, der namen hie gescriben sind. Her Levtold von Chvnring Her Stephan von Messaw (sic) Her Chvnrat von Pvechperch, Her Hadmar von Svnnwerch Her Ott von Zelking Her Chvnrat von Arenstayn, Her Gvndakcher von Retelnperg Her Hainreich von Pavmgarten Her Gotfrid von Totzenpach Her Herwort von wielantstal Her Alber von Gozesdorf vnd anderer frvmer levt genvech den dev red vnd dev sach wol chunt ist. Ditz ist geschen vnd der prief gegeben do von Christes gepurd ergangen warn Tavsent lar drev hundert lar dar nach in dem achten lar an sand Merteins tag an sand Merteins tag an sand Merteins tag.

Source Fulltext: FAIGL, Herzogenburg (Wien 1886) S. 34-35