Ich vlreich der Ternwerger vergich vnd tuen chvnt allen den die disen prieff an sehnt oder lesen hornt, die nv lebnt oder her nach chvnftig sind, das mier chvnrats des Holtzer Havsvrawe vro Offmey hat ovfgegeben das lehen das sie von mier gehabt hat also mit weschaidener red das ich chvnraten dem holtzer ierem wiert vnd ier selben vron Offmeyn das selbe gvet wider lich ze rechtem lehen, vnd das selb gvet ist gelegen ze Egendorf der hof ier ansiedel vnd ze Revdnich ein hofstat vnd was dar zv gehort ze veld vnd ze dorf vnd das viertail des zehnts, des hofs ze parschalich, vnd ovch alles das guet, das sie vro Offmey von mier ze lehen gehabt, das han ich im vnd ovch ier den vorgenanten levten gelichen ze rechtem lehen, an den zehent datz vrowendorf vnd das dev red stet vnd vnzewrochen weleib gib ich Chvnraten dem Holtzer vnd seiner Havsvrawen vron Offmeyn disen prief versigelt mit meinem insigel. Des sind zevich her herwort von wielantstal weichhart der Gawel, Ott vnd Wolfker sein prueder der Traysmer Leupolt der Smitzperger Nycla der Helfues vnd anderr frvm levt genvch den dev red chvnt ist. Der prieff ist gegeben do von Crists gepurt ergangen warn Tavsent jar drev hvndert jar dar nach in dem zehentem jar.

Source Fulltext: FAIGL, Herzogenburg (Wien 1886) S. 36