WIer Swester Gertravt von waldekke priorinn ze den zeiten der vrawen Chloster ze Tvln prediger Ordens vnd avch alle der Samnvng des selben Gotshavss vergehen vnd tuen chvnt alle den die disen prief an sehent oder lesen horent die nv lebent oder her nach chvnftig sind Das wier Probst Trosten ze den zeiten vnd avch alle der Samnvng der erbern Chorherren Sand Jorgen Gotshavss ze Hertzogenburch haben gegeben drevtzehen phvnt pfenning wienner mvniz fuer ayn phvnt gvlt wienner mvniz das wier in alle jar dienen scholden an Sand Michels tag vnd das selber phvnt geltes was gelegen avf der hofmarich da nv vnser chloster avf leit vnd jach wier des, wier hieten den vorgenanten herren dev selben gvlt ayn phvnt also vor geschriben ist aus gewechselt pey albrechts des Periger Zeiten der iers gvetes amptman vnd phleger ze den selben zeiten was, vnd man scholt in das selb phvnt pfenning dienen von dem havs das gelegen ist an Merteyns havs, das weylen was des vorgenanten albrechts des Periger, da die herren die vorgenanten des phvnt gvlt nicht avf haben wolden vnd jahen sein ze haben avf der hofmarch, da nv vnser chloster avf leit, vnd fuer das selber phvnt gvlt haben wier dem vorgenanten Probst Trosten vnd der Erbern Chorherren Samnvng Sand Jorgen Gotshavss ze Hertzogenburch gegeben drevtzehen phvnt pfenning wienner mvniz das sie vns vnd vnser Gotshavss dez phvnt gvlts ledich habent lazzen vnd nimmermer hintz vns noch hintz vnserm Gotshavss dhain ansprach dar vmb haben schullen vnd das man fuerpas des chavffes vnd des gewerfts gedench vmb das phvnt gvlts das vor wol wenant vnd geschriben ist, vnd avch von vns stet weleib geb wier dem vorgenanten Probst Trosten vnd avch der Samnvng disen Offen prief ze einem vrchvnd versigelt vnd westetet mit vnsern Insigeln. Des sind zevich her alber von Gozesdorf Chalhoch vnd sein prvder Chvnrat von alarn Leupolt der Smitzperger vlreich der Mayerhofer vnser schaffer ze den zeiten Eberhart der pamngartner Chvnrat der Gavsrab. purchhart. Meynhart purger ze Tvln vnd anderr frvmer levt genvch den disev sach vnd red wol chvnt ist. Der prief ist gegeben da van Cristes gepurd warn ergangen Tavsent Jar drevhvndert Jar dar nach in dem aynleften Jar des vreytages vor phingsten in vnserm Gotshavss ze Tvln.

Source Fulltext: FAIGL, Herzogenburg (Wien 1886) S. 39-40