Ich Wernhart van Nuzdorf vergih vnd tuen ch und alle den die disen prief an sechent. lesent. oder lesen horent. die nv lebent vnd her nach chunftig sind. Daz die Erbern Herren Probst Trosto ze den zeiten vnd alle dev Samnvng. Sand jorgen Gotshauss ze Hertzogenburch. Sunderleich vnd voderleich. Durch Gots Er vnd seiner Hayligen. vnd mervng iers Lobs vnd Diensts. vnd durch der fuedrung willen. dev ich in vnd ierenn Gotshauss getan han. Dreytzich pfunt pfenning wienner gemainer mvnizz. die ich in werayt schon vnd gentzlichen gegeben han. vnd ain pfunt gult. der vorgenanten pfenning ze ierer oblay. die man in alle lar dienen schol an Sand Merteyns Tag van dem guet daz gelegen ist datz Chueffarn. dez guetes dev aygenschaft ist iers Gotshauss dez vorgenanten mit gantzem reht. wer daz guet in nvtze vnd gewer hat. Geyt man in den vorgenanten herren niht. den vorgenanten dienst an dem vorgenanten Tag van dem vorgenanten guet. so get ze wandel dar avf nach Landes sit vnd gewonhait in O^esterreich Setzich pfennig der vorgenanten mvnizz. an alle wider red vnd an allen chryech. darnach inner viertzehen tagen. vnd ze den andern viertzehen tagen, alsen vil, vnd ze den drytten viertzehen Tagen alsen vil. geyt man in dar nach niht ieren dienst. vnd dev wandel in dem nesten meneyt. so ist das vorgenant guet ledichleichen vnd gentzleichen ier vnd iers Gotshauss mit Purchreht. vnd mit gantzem nvtze vnd gewer, an allev wider red vnd an allen chryech. Vnd daz vorgenant guet paydev. gult vnd weraytschaft, dev Ich den Erbern Herren Probst Trosten vnd der Samnvng Sand jorgen Gotshauss ze Hertzogenburch gegeben han. das ist geschehen mit guetem willen meiner hausvravn vron Perhten. vnd aller meiner Erben vnd durch der fuedrvng willen habent sev sich die vorgenanten Herren dar zve verlobt vnd verpunden. daz man alle wohchen zwen tag Meyntags vnd Vreytags. vnd an den vier vnser Vravn habent. vnd ze den vier gantzen Quotembern. an den pfintztag vnd in der vasten alle wohchen Meyntags. Mytichens. Vreytags. Samtztags. vnd an den heyligen habenten ze O^estern vnd ze Pfyngsten. vnd die vier Metteyn in der antlavzwohchen Ebichleichen mess sprechen schol Ayner der Samnvng der Herren des vorgenanten Gotshauss. in ierer chappeln ze Nuzdorf datz Sand Johans. dev ier Gotshauss mit gantzem reht van alten zeiten an geho^ert vnd ier ist. welicher der Chappeln van iers Gotshauss Probst gescheft vnd gepot chapplan vnd phleger ist. in der man emaln niht mer dann dez Sunntags vnd an den veyertagen mess gesprohchen oder gesungen hat. Savmt in ehaft no^et da vor er dar niht chomen mach, dev selben savmvng schol er her nach erstatten vnd ervollen. Ich Wernhart der vorgenant han auch wal mit meinem grab ze ligen in ierer chappeln der vorgenanten ze Nuzdorf oder in ierem chlauster ze Hertzogenburch vnd mein hausvrav vnd meine chind. auz genomen iers pferrleichs rehten. da ich sev noch mein Erben nihtz anmven noch wechrenchen schullen. Sev schullen auch, dev Samnvng dev vorgenant pey meinen lemptigen zeiten. vnd nach meinem Tod hinfuer ewichleichen mier vnd allen meinen vodern alle lar an Sand Merteyns abent den lartag wegen mit vigilii vnd mit der Selmess. vnd gewonhait ist. in ierem chlauster ze Hertzogenburch vnd ze Nuzdorf schol iz tuen wer der chappeln pfleger ist. Vnd wann Ich Wernhart der vorgenant stirb, so schol mich der Probst dez vorgenant Gotshauss selb westatten wa ich ligen wil in dem chlauster ze Hertzogenburch oder in der Chappeln ze Nuzdorf. also daz zeittlich ist. Daz dev red ewichleichen stet weleib gib ich Wernhart van Nuzdorf der vorgenant den Erbern Herren der Samnvng Sand jorgen Gotshauss ze Hertzogenburch. disen prief ze ainem vrchund versigelten mit meinem Insigel vnd mit des Erbern Herren Insigel Probst Haugen Sand Andres Gotshauss pey der Traysem. vnd Hern Gvndakchers Insigel van Retelnperg. Des sind zevch. Probst Hainreich von Sand Polten, her Chunrat van arnstain. her Herwort van wielantstal. her alber van Gozesdorf. Hainreich der Reicholsperger vnd sein prueder Helmweich. Leb van vrevntshausen, Chunrat sein prueder. Fridreich van Nuzdorf. Meinhart van wagrayn. Leupolt der Smitzperger. vnd ander Erber levt. den dev red wol chund ist. Der prief ist gegeben, da van Christes gepurd ergangen warn. Tausent lar. drev hundert lar. dar nach in dem sehtzehentem lar. an Sand Jorgen Tag. In dem Gotshaus ze Hertzogenburch.

Source Fulltext: FAIGL, Herzogenburg (Wien 1886) S. 54-56