Ich Dietreich Puechperger von wazzerberch vergich vnd tuen chunt allen den die disen prief an sehent oder lesen ho^erent, di nu lebent vnd her nach chunftig sind, daz ich mit meiner gueten freunt rat, vnd meiner hausfrowen vrovn Gerdrauten vnd aller meiner erben guetleichem willen, di aigenschaft di ich gehabt han an einem weingarten auf der Raevdnich, do man mier von gedient hat alle iar an sant Margreten tag zwen pfenning wienner gemainer mvnizz, durch aller meiner vordern sel willen, vnd auch mein selbes hail, gegeben han dem goteshaus des gueten Sand Georgen ze Herzogenburch, vnd aller der Samnvng des selben gotshauses ze rehtem aigen als ich vnd mein vordern daz selb aigen her haben praht. Vnd han in auch gelobt, vnd avch mein Hausfrow vrov Gerdraut daz vorgenant aigen ze schemen wo in des no^et geschicht, als reht ist in Osterreich. Gieng wier in des schermes ab des ob got wil niht geschieht, wiegetanen schaden si des naemen an dem vorgenanten aigen vnd an der chost di dar auf gieng den schulle wier in ab tuen. Daz di red staet vnd vnverchert beleib gib ich in dem goteshause vnd der Samnung disen prief versigelt mit meinem Insigel zv einem rehten v^erchund vnd zv gantzer staetichait. Des sint gezeug. her Chunrat von Arnstain. her Gundacher von Raetelperg. her Otto von weizzenberch. her Herbort von wielantstal. her alber von Getzesdorf. her wernhart von Nuzdorf. Alram von der linden, hainreich der Reiholdsperger. leupold der Smitzperger. vnd ander erber levt genu^ech. Der prief ist gegeben nah Christes geburt vber Tausent jar dreu hundert jar. dar nah in dem Sechzehenten jar an der heiligen zwelif Poten tag Sand philippes vnd sand jacobs ze Herzogenburch in dem goteshaus.

Source Fulltext: FAIGL, Herzogenburg (Wien 1886) S. 56-57