Ich Dietreich Puechberger von wazzerberch vergih vnd tuen chund allen den div disen prief an sehent oder lesen horent. div nv lebent vnd her nah chumftig sint. daz ich mit meiner gueten vrevnt rat. vnd meiner hausvrown vron Gerdrauten vnd aller meiner erben guetleichem willen, meines aygens cehen levhs akhers vnd ain halps pai ossarn. daz Chunrat Patzmanstorfer von mir ze lehen het. vnd man im von den vorgenanten ekhern. ain phunt vnd zwelif phenning wienner Munzz alle iar an sand Michels tag hat gedient, durch aller meiner vodern sel willen vnd auch durch mein selbs hail gegeben han dem Gotshaus des gueten sand Georgen ze Herzogenbu^erch vnd alle der Samnung des selben Gotshaus ze ainem rehten aygen. als ich vnd mein vodern daz selb aygen her haben praht vnd han auch gelobt vnd mein hausvrow daz vorgenant aygen ze Scherm wo in des not geschieht als reht ist in Osterreich. ging wir in des ab des vorgenanten Scherms. des ob got wil nicht geschieht, wiettanen schaden sev des nemen an dem aygen. vnd an der chost den schull wir in ab tuen vnd schulln sev daz haben auf alle dev wir haben in Osterreich. Daz div red stet vnd vnuerchert beleib gib ich im dem Gotshaus vnd der Samnung disen prief versigelt mit hern Gundakchers Insigel von Retelperg vnd mit dem mein selbs. mit hern Otten des weizzenberger zv ainem rehtem vrchv^end. vnd ze gantzer stetichait. Des sint zevg. her Chunrat von Arnstain. her Chunrat Tiernstainer her Ott von Raer her Seifrit schench her Herwort von Bielantztal her Alber von Gozesdorf. vlreich tozenpech. Olram von der linden. Leupold Smitzperger vnd ander erber levt genuech. Der prief ist gegeben nah Christes gepu^erd vber Tausent lar drev hundert iar dar nah in dem Subencehenten iar an sand veits tag. ze Herzogenbu^erch in dem Gotshaus.

Source Fulltext: FAIGL, Herzogenburg (Wien 1886) S. 59-60