Ich Hainrich der Panpruker von Mverrsteten vergich vnd tvn chvnt allen den di disen prief an sehent oder ho^erent lesen die nv lebent oder her nach chvnftich sint. Daz ich han gechovft datz Chvnraten von Gvetenprvnn vnd datz seiner Hausvrowen vnd datz ir paider erben vnd datz vern Offmein von Grintdorf zwai Drittail eines Hofs datz Gvmpoltinge Daz selbe purchrecht dient alle iar an sand Mychels tag Siben vnd Ohtzk phenning wienner gemainer mvnze hintz dem erbern Gotshavs datz sand Georigen ze Herzogenwurch vnd der erbern Samnvng des Convents da selben also mit beschaidener rede swenne ich daz vorgenant gvet verchovffen wil so schol ich ez ovf geben var dem erbern Probst ze Herzogenwurch, vnd schol man ez ovch wider ovf enphahen von dem selben Probst ze Herzogenwurch mit dem selben purchrecht vnd ich ez gehabt han ovf vnd ab vnd als ez von alten zeiten her chomen ist, vnd schol ovch ich mit dem selben purchreht allen meinen vrum schaffen vnd mein erben, waer aber daz wir savmich waern mit dem dienst ze dem tag als vor geschriben ist so scholt wandel dar ovf gen, als purchrehts recht ist vnd des landes gewonhait in Osterrich. Daz disev rede also staet vnd vnzebrochen beleibe, dar vber so gib ich Hainrich der Panpruker von Mversteten dem erbern Gotshaus datz sand Georigen ze Herzogenwurch vnd der Samnvng des Convents disen prief versiglt mit meinem Insigel vnd mit der erbern herren Insigeln di her nach benant sint. hern Otten von weizzenwerch hern wernharts von Nvzdorf hern hertwigs des Lo^echler Meinharts von Po^eting di irew Insigel an disen prief gehangen habent zv einem gezevch vnd zv einer bestaetichait diser sache vnd sint der rede gezevge her heinrich von Espinshoven her Olber von Go^etzeinsdorf her Cholhoch von Alarn Leupolt der Smitsperger vnd ander piderbe levt genvech den disev sache wol chvnd vnd gewizzen ist. Der prief ist gegeben datz Herzogenwurch Do von Christes gebvrt warn ergangen Tausent iar Drev hundert iar vnd dar nach in dem Ohtzehenten iar ze Phingsten.

Source Fulltext: FAIGL, Herzogenburg (Wien 1886) S. 65-66