Wir Abt Ru^eger von Gotez gnaden vnd dev Sampnung ze Malherstorf tuen chvnt allen den die disen brief ansehent oder horent lesen. Daz vnser genaediger herr her Levto etwenn von Chv^enring vnserm Chloster ein hantfest hat geben vber dev reht dev ez ovff gu^etern ze O^esterrich haben sol. der er etwenne vogt waz. in der mazze. als da geschriben ist. Wir Levtolt von Chu^enring. Schench in O^esterrich. tuen chvnt allen den. di disen brief ansehent oder horent lesen daz ovf allem dem gut daz hintz dem Chloster ze Malherstorf gehort da wir vogt v^eber sein, Der Abt von dem selben Chloster oder sein amman gewalt ze rihten hat swaz in haus oder in hof vnzvht geschiht das ist swert zvken, verboten wort, rauffen. Stozzen. slohen. vnd v^eberuanch an velden, an werden, an weingarten. vnd auch daz man in dehainen gewalt tuen sol an ir viechwaidt also daz ovf den werden di si habent niemant halten sol on ir guten willen. vnd ir waidt pfenning nieman sol innemen, denne ir pfleger. oder swen si wellent. vnd auch daz si ir gruntrecht ovf ir vischwaidt mit ganczem gewalt also haben daz niemant vischen oder aericht haben sol. vnd swaz vmbe gu^elt oder vmb purchreht hintz ir aigen gechlaget oder gesprochen wirt, daz sol vor dem vorgenanten abt oder vor sinem pfleger allez gerihtet werden, vnd ob ein totslach geschieht ovff ir aigen so sol sich der vorgenant pfleger allez dez vnder winden daz dez schuldigen mannes ist. vnd sol daz behalten vntz daz er vns vnd dem Land behvldiget werde. ist aber daz er geuangen wirt. so sol man in dem geriht geantwrten als er mit gv^erteln vmbefangen ist. Daz daz also ist. daz wir vnserz vorgenanten herren hern Levtoldez etwenne von Chv^enring hantfest vnder sinem Insigel haben dez haben wir abt Rv^eger vnser jnsigel zv ainem vrchvnde an disen brief geben. vnd ist der geben. do von Christes gepvrt woren drevzehen hvndert iar. her nach in dem achtzehendem iar. an sand virgilgen tag.

Source Fulltext: FAIGL, Herzogenburg (Wien 1886) S. 67-68