Ich Wolfker von wielantztal vergich vnd tuen chunt alle den die disen prief lesent oder horent lesen die nv lebent vnd her nach chumftig sint. daz ich han zwai tail an dem hofe datz wielantztal div mein Rehtes Purhreht sind von dem Probst vnd der Sammvng sand Georgn gotshaus datz Herzogenbu^erch. also beschaidenlaich. daz ich dem vorgenanten gotshaus alle ierchleich schol dienen zwainzig Metzen Chorns vnd zwainzich metzen Gersten vnd zwainzich metzen Habern von dem selben hofe. vnd hat auh mir der Brobst Trost vnd die sammvng die gnad getan, daz ich in den vorgenanten dienst iner Cehen iarn niht dienen schol, vnd wann die cehen iar ein ende habent. so schol ich in den hofe verdienen mit dem selben dienst vnd vorgenant ist. vnd auer ich in den selben cehen iarn ainen trayd dienst daz auf gestiftem guet ist zwischen Tuln vnd Melhc hie der halb Tvenawe. der als guet ist sam der dienst den ich in dienen schol von dem vorgenanten hof daz vnser paider vmsetzen bei irn triwn wol gesagen mugen den schuln sev von mir nemen an alle wider red. Wer auer daz. daz ich chauft ein guet daz tevrr wer dene der dienst den ich in dienen schol. die selb uber teurung schuln siv dar geben an allen chrieg. vnd ist auch dann der selb hof mein Rehtes Aygen ledichleich vnd meiner erben, wer auer daz daz ich sturbe in den selben cehen iarn. swem dann der selb hof ane gevelt vnder meinen erben. der schol in verdienen in dem selben iar vnd hin fuer alle ierchleich mit dem selben dienst vnd vor gescriben stet, vnd ist auch die sahhe geschehen mit meiner swester vron Chunigunden guetleichem willen vnd nah meiner besten vreunde rat. Vnd daz die red stet vnd vnuerchert beleib. dor uber gib ich vorgenanter Wolfker im dem Gotshaus disen prief versigelten vnd besteten mit meinem aygen Insigel. vnd mit der erbern Herren insigel hern Chunrat von Tirnstain. hern Gundackers von Retelnberg hern wernhartz von Nusdorf hern Olbers von Gozesdorf. vnd mit meins gesweins insigel Meinhartz von wiermla. Vnd der sahh sind zeug, her Chunrat von walpersdorf. Olram aus der Awe. Gotfrid von Ayno^ed Leutold von Ayno^ed. Leupolt Smitsperger Hainreich straibler Leupolt chaufman vnd ander erber laeut. den die sahh wol chunt vnd gewissen ist. Der prief ist geben do von Christes gepu^ord warn ergangen Dreucehen Hundert iar dor nah in dem Neuncehenten iar ze Herzogenburch in dem Gotshaus. an vnser vrown tag z ter Liehtmesse.

Source Fulltext: FAIGL, Herzogenburg (Wien 1886) S. 68-69