Ich Chvnrat von Tyernstain vnd mein Hausvrowe ver Jevtt vnd vnser paider erben veriehen vnd tvn chvnt allen den di disen prief ansehent oder hoerent lesen di nv lebent oder her nach chvnphtich sint. Daz wir mit guetem willen aller vnser erben vnd mit verdahtem mvet haben gegeben innerchleich durich got vnd durich sand lacobs willen ovf daz Gotshavs ze Revdnich der erbern Samnvng des Convents datz Herzogenwurch ein Lehen datz oberwinden daz gelegen ist ovf Revtaechern daz ich dem vor genanten Gotshaus mit gewalt vnd onreht het enphuert, vnd des selben gewalts hab wir vns erchant ich vnd mein erben daz ez wider vnser gewizzen waer also daz wir fuerbaz chain reht noch chain ansproch an dem ee genanten gvet schvlln haben vnd ovch nimmer mer chainn gewalt daran pegen waer aber daz daz wir daz gelubd indert an chaim ding ze prechen ich oder mein erben swaz dez daz ee genant Gotshavs mit der vor genanten Samnvng des Convents schaden naemen den selben schaden schvlle wir in ab legen vnd schvllen sev daz haben ovf alle dev vnd wir haben in dem Lande ze Osterrich. Daz disev red also staet vnd vnzebrochen beleib Dar vber so gib ich Chvnrat von Tyernstain der vorgenanten Samnvng des Convents ze Herzogenwurch disen prief versiglt mit meinem Insigel zv einem offenn vrchvnde vnd zv einer staeten sicherhait diser sache vnd sint der rede gezevch her Gvndacher von Raetelnperg her wernhart von Nvzdorf her Olber von Goetzeinsdorf Leupolt der Smitsperger vnd ander piderber leut genvech den disev sach wol chvnt vnd gewizzen ist. Der prief ist gegeben datz Hertzogenwurch do von Christes gepu^erd warn ergangen Tausent iar Drev hvndert iar vnd dar nach indem Nevntzehenten iar an Sand veits tag.

Source Fulltext: FAIGL, Herzogenburg (Wien 1886) S. 70-71