Ich Levtold von Schavnwerch. Probst ze Matse. chorherre ze Pazzawe. Pfarraer ze den zeiten ze Gravenwerd vergich an disem brief vnd tv^on chunt allen den di in lesent oder ho^erent lesen. daz ein chrieg avf erstanden waz. von hern Trosten, ze den zeiten Probst ze Hertzogenwuerch. vnd sinen zehentnaern gegen mir vnd gegen minen zehentnaern. vmb vnser zehent in der pfarre ze Gravenwerd. do verdahten wir vns des baid mit veraintem rat. daz wir baid namen vier der besten vnter den edeln laevten. hern Wernharten Drvhsaetzen von V^etzesdorf. vnd Chalhoch Haekchlein von dem Wosen. vnd Lewen hern Otten svn von Gravenwerd. vnd Hainreichen hern Lewen svn von Gravenwerd. vnd dar zv vier der besten pavlaevten avch in der pfarr ze Gravenwerd den vmb di sache aller best chvnt vnd gewizzen was. swaz di acht spraechen vnd sagten bei ir gewizzen vnd bei ir triwen vmb den vorgenanten chrieg. daz solten wir baid staet haben, vnd swaz di vorgenanten acht sagten des der Probst vnd sein Gotshavs von mir bei minen zeiten vncl von minen verwesern entwert waer. da solt ich von lazzen. vnd solt auch mich sein auzzen. also daz dem Gotshavs ze Hertzogenwurch fvrbaz chrieg von mir vnd von minen nach chomen avf erstv^ent vnd erfv^ern sich di vorgenanten acht mit den besten vnd mit den aeltisten in der pfarr vnd sagten vor mir. vnd vor dem Probst vnd vor den besten di in der pfarr ze Gravenwerd warn, daz der Probst vnd sein Goteshavs an dem newen Pergentwert waer drittail weintzehent vnd an dem alten Nevsidel vntz vnder den chogel als der pflveg ê gegangen was. da er emoln di dritten garb traides genomen hiet. dann ain weingart der nevraevt ist da chain pflveg ê niht an chomen ist. Vnd sagten avch bei ir gewizzen vnd bei ir triwen daz ich im vor hab genomen drittail zehents auf des Ergaer hof. vnd daz drittail der pvrchreht aekcher di niht der alten widern sint. vnd sagten avch daz di vorgenant pfarr ze Gravenwerd an chlainem zehent niht anders enpfor hiet danne Gens vnd Hv^ener. vnd vmb di selben enpforgab sol ich oder swer pfarrer ze Gravenwerd ist dem vorgenanten Gotshaus ze Hertzogenwurch grozzen zehent vnd chlainen in bringen mit der Gotes ê. vnd nach der erwaern laevt sag vnd rat avzzent ich mich alles des da si vmb gesagt habent. des daz egenant Gotshavs ze Hertzogenwurch von mir entwert was, also daz dem vorgenanten Goteshavs von mir vnd von minen nach chomen hin fu^er chain chrieg avf erstê. Daz disev red staet vnd vntzebrochen beleib dar vber gib ich im ze einer bezzern sicherhait disen biief versigelt mit meinem insigel vnd mit mines vetern Graf Chvnrats insigel von Schovnwerch der diser pfarr ze Gravenwerd rehter lehenherr vnd vogt ist. Diser red vnd sache sint zevg. her Herwort von Egendorf. her Dietreich sein svn. her Lew ze den zeiten richter ze Gravenwerd. Lew Drvchsaetz von V^etzesdorf vnd ander erwaer Laeut pfaffen vnd laien di der sache zevg sint. Der prief ist geben, an sant Marein Magdalen tag ze Gravenwerd. do von christes gebv^erd warn ergangen Drevtzehen hvndert iar dar nach in dem ain vnd zwaintzkisten iar.

Source Fulltext: FAIGL, Herzogenburg (Wien 1886) S. 76-77