Ich Chunrat von Egendorf vnd mein Hausvraw Sophei vnd alle vnser erben wir vergehen an disem prief vnd tuenn chunt alle den die in lesent oder lesen hornt die nv lebent vnd her nah chunftig sind Daz wir mit verdahtem muet und mit gunst aller vnser vreunt durich vnserr vodern selle willen vnd auh durich vnser selbes hail haben geben vnsers rehten aygens ein lehen datz Reizing do von man dient alle iar an sand Michels tag drei schilling phenning wienner munzz vnd drev huen vnd dient ze Ostern fier chese ze weisat ze phingsten fier ze weinahten fier vnd schol ie der ches cehen phenning wert sein vnd von aim acher dient man drei phenning. der Sammung sand Georgn gotshaus datz Herzogenburch iz sei gestift oder vngestift versueht oder vnuersueht ze veld ze dorf mit alle dem rehten, vnd wir ez vnd vnser vordem her praht haben ledichleich vnd vnuerchumbert vnd pin auh ich vorgenanter Chunrat des vorgenanten guetes ir scherm vnd ir gewer als aygens reht ist vnd des landes gewonhait in Osterrich vnd durich pezzer sicherhait setz ich dem vorgenanten goteshaus vnd der Sammung zv sampt mir mein vettern hern Diethen von Egendorf mit seinem insigel vnd mein paid svnn Diethen vnd Andren zv rehten gewern vnd scherm des guetes. wer auer daz, daz wir im dem gotshaus vnd der Sammung des scherms ab giengen des ob got wil niht geschieht wie tanen schaden dsev des nemen an chost oder an mve vnd an arbait dev sev bieten vm daz guet den schulle wir dem gotshaus ablegen vnd der. Sammung an alle widerred vnd an allen chrieg. vnd schullen sev daz haben auf alle dev vnd wir haben in dem lande ze Osterreich, vnd daz dem gotshaus vnd der Sammung die red stet vnd vnuerchert beleib dor vber gib ich disen prief versigelten vnd besteten mit meines vettern Insigel hern Dieths von Egendorf wand er den scherm mit sant mir gelobt hat vnd mit mein selbs Insigel. Des sind zeug her Chunrat von Arnstain her Gvndakker von Retelnperg her Herwort von Egendorf her wernhart von v^eczeinsdorf her wernhart von Nusdorf her wolfker der wiert von wograin Leb der Drugsetz Chunrat sein prueder. Gotfrid von Ayno^ed vnd ander leut genvech den die sahhe wol chunt ist. Der prief ist geben do von Christes gepuerd warn ergangen Tausent iar drevhundert iar dar nah in dem ainsvndzwainzigisten iar an dem aufvert tag.

Source Fulltext: FAIGL, Herzogenburg (Wien 1886) S. 74-75