Ich vlreich Lauher vnd mein hausvrow vro Agnes vnd mein sune all vier Nycla vnd Stephan vnd Jans vnd auch Ott wier vergehen vnd tuen chunt allen den die disen prief sehent oder hornt lesen die nv lebent vnd her nach Chunftich sind. Daz wier mit verdachtem muet vnd mit gunst vnser pesten vreunt haben ze chauffen gegeben vnser guet ain lehen daz do leit datz Rust daz Nevn schilling phenning dient an sand Michels tag vnd auch an der selben stat vierdhalb schilling gelt auf vber lent echern hern wernharten von Nuzdorf daz vnser rechtz aigen ist gewesen vm Sibentzchen phunt wienner gemainer munzz der er vns recht vnd redleich gewert hat also beschaidenleich daz wir daz selbe guet vnd dev selbe aigenschaft haben gegeben dem Gotsshaus hintz Nuzdorf hintz dem Nuzdorf daz do leit pei der Traisem vnd dem gueten herren sant Johans der do rast ze alle dem recht als wier iz do haben gehabt vnd sein des selben guetes des vorgenanten Gotshaus scherm vnd sein gewer fuer alle ansproch als man aigen scherm sol als des Lants recht ist in Osterrich vnd durich pezzer sicherhait setz ich mich wolfhart von Gaindorf mit sampt in der selben red ze gewer vnd ze scherm als vor verschriben ist an disem prief. wer auer daz daz Gotshaus dar vber chain schaden nem an dem selben guet mit recht daz der pharrer mecht gesagen pei seinen triwen daz lob wier im vnverschaidenleich mit vnsern triwen daz wier im den schullen ablegen dem selben gotshaus an all wider red tet wier des niht swer danne zten zeiten lants herre ist in Osterreich der schol mit vnserm guetleichem willen vnd an allev chlag vnsers guets in geantwurten als wier iz haben in Osterreich dem vorgenanten gotshaus vnd schol auch der pharrer des vorgenanten Gotshaus daz so lang in haben vntz wier im allez daz laisten als wier vor verschriben haben an disem prief vnd daz disev red stet vnd vnuerchert peleib Dor vber gib ich vlreich Lauher vnd der vorgenant Wolf hart disen prief versigelten mit vnsern paiden Insigeln zu einem vrchund vnd zu einem gezeug diser sach. Des sind gezeug Her Gundacher der Retelperger her Ott der weizzenberger von Retelperg her philipp der Totzenpech von Gotzesdorf her Fridreich von Nuzdorf her leb von vreuntzhausen wolfker von wielantzstal Alram auz der au vnd ander vrum Leut den dev red vnd dev sach wol chunt vnd gewizzen ist. Der prief ist gegeben do von Christes gepurd warn ergangen Tausent Jar drev hundert Jar dor nach in dem drev vnd zwaintzkisten Jar Datz Hertzogenburch in dem Gotshaus an sand Michels tag.

Source Fulltext: FAIGL, Herzogenburg (Wien 1886) S. 86-87