Ich Hainreich von Atzenprukk vnd mein Hausvrove vrov Mehthild vnd vnser Tohter Anna vnd vnser paid Svn Vlreich vnd Hainreich wir vergehen an disem prief vnd tuen chund alle den div in lesent oder lesen hornt die nv lebent vnd her nach chunftich sind. daz wir mit gesampter hant vnd mit gunst aller vnser erben haben ze chauffen gegeben vnsers rehten aygen daz lehen datz persnich do weiln auf gesezzen waz Seifrid der wognner do von man dient Sehcehen Metzen waitz vnd ain vnd dreizck Metzen Chorns vnd ain vnd dreizck Metzen haber. vnd drei vnd Sehzig phenning an sand Michels tag. vnd ain hofstat dev in daz selb lehen gehort vnd ain hofstat dor von man besunder dient Svbenchen phenning ztem selben tag Hern Wernharten von Nuzdorf vm zwainnfierzig phunt phenning wienner munzz der er vns redleich vnd reht gewert hat. vnd haben auch im daz selbe guet geben mit alle dem rehten vnd nutz vnd wir ez vnd vnser vodern her praht haben ez sei gestift oder vngestift versueht oder vnuersueht ze veld vnd ze dorf vnd hab auch wir div aygenschaft des selben guetes vnserm Herren Sand Johans hintz Nvzdorf gegeben daz do leit bei der Traisem vnd schulle auch wir des vorgenanten guetes des gotshaus scherm vnd gewer sein als landes reht ist in Osterrich. Taet wir auer des niht swer dann lantz herre ist in Osterrich der schol mit vnserm gueten willen vnsers guetes dem selben gotshaus ingeantwurten vnd scholl daz so lang inne haben vntz daz wir dem gotshaus oder seim verweser alles daz laisten als hie verschriben ist an disem prief. vnd daz disev red stet vnd vnuerchert beleib dor uber gib ich vorgenanter Hainreich im dem gotshaus disen prief versigelten vnd bestetten mit meim aygen Insigel vnd mit meins Svns insigel vlreich vnd mit meins svns insigel Hainreich zv aim warn vrchund vnd zv aim zeug diser sahhe. Des sind zeug her Chunrat von Arnstain her Chunrat von Tyrnstain her Ott von Weizzenberch her Gundacher von Retelnperg Olram in der owe Levpold Smitsperger vnd ander erber leut genuech, den die sach wol chund vnd gewizzen ist. Der prief ist geben do von Christes gepu^erd warn ergangen Tausent Jar drev hvndert iar dar nah in dem drev vnd zwainzigisten iar an Sand Gregorn tag Datz Herzogenburch in dem gotshaus.

Source Fulltext: FAIGL, Herzogenburg (Wien 1886) S. 77-78