Ich Chvenrat der Perger von Reichhersdorf vnd Mein Havsvrowe ver Elspet ver iehen vnd tven chvnd allen den di disen prief an sehent oder ho^erent lesen di nv lebent vnd her nach chv^onftich sind Daz wier mit vnserr paider gvetem willen vnd vnsers Aidems Hern Dietmares von Chvolib vnd seiner Havsvrowen vnserr Tahter vnd aller vnser erben gvetleichem willen haben gegeben Sand Georgen Gotshavs vnd den Chorherren des selben Gotshavss ze Hertzogenwurch zehen vnd drei Schilling phenning Gv^olt wienner gemainer mvnze vnsers rehten Aigens di da ligent datz Ober Winden enhalb der Traisem ovf Revttaechern also mit so^elicher ovz genomener rede Daz vns diselben vorgenant Chorherren von Hertzogenburch habent ze wider wechsel gegeben Ohtzk phenning Gelts der vorgenanten mvnze di da ligent datz Chv^olib in dem Marcht ovf einer hofstat vnd schol man in wurbaz alle iar di ê genanten zehen vnd drei schilling phenning dienen immer an Sand Mychels tag vnd vvur daz v\obrig daz vnsers Gvetes mer ist gewesen habent vns di ê genanten Herren her zv gegeben Siben Schilling phenning der vor genanten mvnze der wier schon vnd redleich gewert sein. Dar vber ze pezzerr sicherhait setz wir vns Ich Chuenrat der Perger vnd ich Dietmar von Chv^olib der vorgenanten Gv^olt ze rehtem Scherm als des landes reht ist in O^esterrich den vorgenanten Herren wier haben in ovch daz gelobt mit vnsern trewen swaz sev daran schadens nement swi so daz genant ist daz schvlle wier in abtven, swo wier des niht entven so schvllen si ez haben ovf alle dev vnd wier haben in dem Lande ze O^esterrich. Daz disev rede also staet vnd vnzebrochen beleibe dar vber so geb ich als wier vor benant sein den ê genanten Herren der Samnvng datz Sand Georgen Gotshavs ze Hertzogenwurch disen prief versigelt mit vnsern paiden Insigeln zv einem offenn vrchvnd vnd zv einer staeten sicherhait diser sache vnd sind der red getzevch Her Gvndacher von Raetelnperg Her Ott von weizzenberch Her Wernhart von Nvzdorf Her Chvnrat sein Svn vnd anderr piderber levt genvech den disev sache wol chvnd vnd gewizzen ist. Der p rief ist gegeben datz Hertzogenwurch do von Christes gebvrt warn ergangen Tavsent iar Drev hvndert iar dar nach in dem drev vnd zwaintzkistem iar an dem heiligen Ovfvart tag.

Source Fulltext: FAIGL, Herzogenburg (Wien 1886) S. 83-84