Ich Dietrich Siernincher von yming vnd mein Hausvrow vro Gedrout wier vergehen an disem prief vnd tuenn chund alle den div in lesent oder lesen hornt div nv lebent vnd her nach chunftig sind. Daz wir mit verdahtem muet vnd mit gesampter hant zter zeit do wir ez wol getuen mohten vnd mit vnser gerben guetleichem willen haben verchauft vnsers rehten aygens daz lehen datz Nuzdorf vnd den weingarten der dor zve gehort. hern wernharten von Nuzdorf vm fiertzk phunt phenning wienner munizz der er vns redleich vnd reht gewert hat vnd han auch ich vorgenanter Dietrich div selb aygenschaft gegeben dem gueten Herren s a n d I ohansen hintz Nuzdorf daz do leit bei der Traisem mit alle dem rehten vnd nvtz vnd ich ez vnd mein vodern daz selb guet her praht haben ez sei gestift oder vngestift versucht oder vnuersueht ze veld vnd ze dorf im dem gotshaus ledichleich ze haben, vnd pin auch ich vorgenanter Dietrich vnd Seifrid sein prueder des selben guetes scherm vnd gewer fuer all ansprach als Landes reht ist in Osterreich vnd durich pezzerr sicherhait setz ich dem vorgenanten gotshans sampt mir vnd mein prueder meinen O^ehaim hern Hertbeigen den Lo^echler vnd Chunrat den Lochler seinen prueder ze gewer vnd scherm als mich selb. wer auer daz daz wir dem gotshaus oder sein verweser des scherms abgiengen wietannen schaden sev des nemen daz gotshaus vnd auch sein phleger den schull wir in ablegen an all wider red vnd an allen chrieg. vnd loben auch daz mit vnsern trwn. Tet wir auer des niht swer dann Landes herre ist in Osterrich. der schol dem selben gotshaus oder seim verweser vnsers guetes mit vnserm guetem willen so vil in geantwurten vnd schol daz so lang inne haben vntz daz wir dem gotshaus oder seim phleger alles daz laisten als hie verschriben stet an disem prief. vnd daz im dem gotshaus vnd seim verweser disev red stet vnd vnzebrochem beleib dor vber gib ich disen prief versigelten vnd bestetten mit meins Ohaims Hertwigs des Lochler Insigel vnd mit Chunrats Insigel seins prueder. wand ich aygens Insigel niht enhan fur alle ansprach. Des sind zeug her Christan der Drugsetz, her Chunrat von Tyernstain. her Ott von weizzenberch. Olram in der owe. Leutold von ayno^ed Gotfrid sein prueder vnd ander laut genuech den ez wol chund vnd gewizzen ist. Der prief ist geben do von Christes gepurd warn ergangen Drevcehen hundert Jar dar nach in dem drev vnd zwaintzigistem Jar des phintztages vor den phingsten.

Source Fulltext: FAIGL, Herzogenburg (Wien 1886) S. 85-86