Ich Wernhart von Nvzdorf vnd mein Svn her Chunrat von Walprehtzdorf, vnd mein Svn Jans vnd mein Tohter Perht, div Flemingerinn vnd mein Tohter Perht vnd mein Eninchel Stephan, wir vergehen an disem prief vnd tuen chunt alle den div in lesent oder lesen hornt daz wir mit verdahtem muet vnd mit gesamter hant vnd mit gunst aller vnser erben haben gegeben durich got vnd durich vnserr vodern sel willen vnd durich vnser selbs hail vnsers rehten Aygens den hof datz Wolfhesdorf, do von man dient zwen Mutt Chorns vnd zwen Mutt Haber vnd ein halphunt phenning fu^er ein Swein vnd zwelif Ches vnd schol ie der Ches dreir phenning wert sein vnd Sehs Geens vnd zwelif huenrr fier Vaschanch huenrr vnd aht Herbst huenrr vnd ein halphunt air ze Ostern, dem gueten herren sand lohansen vnd dem Gotshaus hintz Nuzdorf daz do leit bei der Traisem mit allem rehten den selben hof ze haben. Er sei gestift oder vngestift versueht oder vnuersueht ze veld vnd ze dorf mit alle dem rehten vnd nutz vnd wir daz selb guet vnd vnser vodern herpraht haben ledichleich vnd vnuerchumbert. vnd ist auch der selb hof geraitet fu^er funfthalb phunt phenning gult vnd fu^er dreizk phenning vnd sei auch wir des vorgenanten hofes gewer vnd scherm fuer all gerben vnd fuer all ansprach als lantz reht ist in Osterrich. Taet wir auer des niht so lob wir mit vnsern triwn swer dann lantz herre ist in Osterrich der schol dem vorgenanten gotshaus vnsers guetes so vil ingeantwurten oder swer des gotshaus phleger ist vnd schol daz so lange innehaben vntz daz wir dem gotshaus oder seim verweser alles daz laisten als hie verschriben ist an disem prief. vnd daz disev red stet vnd vnuerchert be leib dor uber gib ich vorgenanter Wernhart im dem gotshaus disen prief versigelten vnd bestetten mit meim Insigel vnd ich vorgenanter Chunrat sein Svn mit meim Insigel vnd ich lans sein Svn mit meim Insigel. vnd durich pezzer sicherhait setz ich mich Piligreim der fleminch hern wernhartz aydem dem selben gotshaus ze gewer vnd scherm mit meim Insigel vnd pin ich apt Marichart von Chotweich der red zeug mit meim Insigel vnd ich Christan Drugsetz von vihofen mit meim Insigel vnd ich Chunrat von Tirnstein mit meim Insigel wand div sahh all vor vns gewandelt ist. Der red ist zeug her Chunrat von Arnstain her Ott von weizzenberch her Gundacher von Retelnperg Leutold von Ayno^ed Gotfrid sein prueder helmweich Reihholtzperger Leupold Smitsperger vnd ander laeut genuech den ez wol chund vnd gewizzen ist. Der prief ist geben do von Christes gepu^erd warn ergangen Tausent iar drev hundert iar dar nach in dem drei vnd zwainzigisten Jar. an dem palm tag.

Source Fulltext: FAIGL, Herzogenburg (Wien 1886) S. 79-80