Ich Gedraut von Olarn ver gich vnd tuen chund mit disem prief allen den die in sehent oder lesen hornt die nu lebent vnd hernach chunftig sint Daz ich mit meiner Sun aller dreir Herliebs Chalhahs vnd auch Chunrats gueten willen vnd auch mit gunst aller meiner vreunt vnd aller meiner Erben zter zeit do ich ez wol maht getuen gegeben han daz halb lehen daz ich ze Stetten ge habt han daz mein Rehtz Aygen gebesen ist do man von dient all Jar drei vnd zwaintzik metzen Chorens vnd drei vnd zwaintzik Metzen Habern vnd Sehzik phenning wienner ge mainer munzz an sand Michels Tag durch aller meiner vadern Sel willen vnd auch mein selber hail dem Gotshaus des gueten Herren sand Georgen ze Hertzogenburch vnd all der Samnunge des selben gotshaus mit alle dem reht vnd nutz vnd ez all mein vodern vnd ich selb haben her praht ez sei gestift oder vngestift versueht oder vnversueht ze veld vnd ze dorf ledichleich vnd vnverchummert vnd pin auch vnd mein Sun die vorgenanten des egnanten Guets des egnanten Gotshaus vnd der Samnung scherm vnd gewer fuer all ansprah als aygens reht ist in dem Land ze Osterreich vnd durch pezzer Sicherhait setz ich vorgenantev Gedraut dem vorgnanten Gotshaus mit sampt mier Eberharten von Chatzenperg mit seinem Insigel ze gwer vnd ze scherm als mich selben. wer aber daz daz wier in des Scherms von chainer lai sach ab giengen wie getan schaden sev des nemen an chost oder an mue den si muesten haben vmb daz guet den schull wir in ablegen an all wider red vnd an allen chrieg. Vnd daz dem Gotshaus vnd der Samnung ze Hertzogenburch disev red stet vnd vnzebrochen beleib dor vber gib ich vorgenantev Gedraut von Olarn disen prief versigelten vnd pestetten mit meines Suns Herliebs Insigel vnd mit des vorgnanten Eberharts von Chatzenperg Insigel fuer alle ansprach. Des sind gezeug die erbern Herren her Hainreich der Marschalch von Pappenhaim her Gundacher der Retelperger her Ott der weizenberger her wernhart von Nuzdorf her Philipp der Totzenpech leupolt der Smitzperger Olram auz der awe vnd ander erber leut genueg den dev sahh vnd dev red wol chunt vnd auch wol gewissen ist. Daz ist geschehen do von Christes gepuerd warn ergangen Tausent Jar dreu hundert Jar vnd dar nah in dem funf vnd zwaintzkistem Jar an sand Ruprehtz Tag in der vassten datz Hertzogenburch in dem Gotshaus.

Source Fulltext: FAIGL, Herzogenburg (Wien 1886) S. 102-103