Ich Eberhart von Chatzenperig. vnd ich Elspet sein Hausvrowe vergehen vnd tuen cunt allen den die disen prief an sechent lesent oder ho^erent lesen die nv lebent vnd her nach chunftich sint. daz wier mit verdachtem muet vnd gesamter hant ze der zeit do wier iz wol getuen machten mit vnser pesten vreund rot. vnd mit guetem willen aller vnser erben vnsers rechten aigens ain phunt geltes wienner phenning gemainer munizz. des man jerleich dient an sant Michels tag sehzig phenning vnd an sant Georgen tag funftzk phenning von ainem halben hof der leit dadz Hord bei alten lempach. vnd viertzk phenning die man dient an sant Michels tag von ainer halben hofstat die leit dadz Asperig. daz ander leit auf vber lent do von man dient acht metzen charns vnd vier vaschanch hvenr. vnd sechs vnd dreizk phenning die man dient an sant Michelstag. mit allem dem nutz vnd recht als wier iz in aigens gewer her proch haben, gegeben haben ledichleichen vnd gentzleichen dem gotshaus vnd der sampnung des gueten herren sand Georgen ze Hertzogenburch auf die Oblay durich vnser sel vnd aller vnser vadern sel willen. allen ieren vrum damit ze schaffen, als mit anderm ierem aigen an allen iersal. vnd schol auch niemm ier Vogt sein denn swer des Landes herr ist in dem lant ze Osterreich, vnd dar vber durich pezzer sicherhait so setzen wier vns Ich Eberhart von Chatzenperig vnd Ich Elspet sein Hausvrowe vnd vnser paider erben vber die vargenanten gult dem vargenanten gotshaus vnd der sampnvng des gueten herren sant Georgen ze Hertzogenburch ze rechtem scherm vnd gewer vuer alle ansprach als aigens recht ist und des landes recht ist in Osterreich. wer auer daz sev an dem var genanten guet mit reht dhainen schaden nemen den selben schaden schull wier in ab legen an alle wider red. tet wier des nicht swer dann des landes herre ist in dem lant ze Osterreich der schol dann mit vnserm guetleichen willen vnsers guets swo wir iz haben in dem lant ze Osterreich der vargenanten Sampnvng in gantwu^erten. vnd schollen sev daz selb guet .so lang in haben vntz en daz wier in alles daz gelaisten daz wier im var ver schriben haben an disem prief. daz dev red stet vnd vnzebrochen beleib dar vber geb wier in disen offen prief zve ainem verchund vnd zve ainem waren gezeug diser sach versigelt mit vnserm Insigel vnd mit meins Oechaims Insigel Herliebs von Olarn. des sint zevg her Wernhart von Nuzdorf vnd her Leb von Vreuntzhausen vnd levtold von Aynoed vnd Gotfrid sein prueder vnd Hainreich von Nevnhoven vnd ander erber leut genueg den disev sach wol chund ist. Der prief ist gegeben datz Hertzogenburch in dem chlaster. do von Christes gepuerd waren ergangen dreutzehen hundert iar in dem vier vnd zwainzkisten iar dar nach an sand Georgen tag.

Source Fulltext: FAIGL, Herzogenburg (Wien 1886) S. 93-94