Ich Ott von grauenberd vnd mein hausfraw vro Alhait vnd all vnser erben veriehen an disem prief vnd tuen chunt allen den die nu lebent oder hernach chunftich sint daz wir mit verdautem muet vnd mit gunst aller vnser erben auch vnd vreunt zder zeit do wir ez wol mahten getuen gegeben haben ein lehen daz da leit ze Oberndorf pei dem marcht ze hertzogenbu^erch daz mein rehtes chauf aigen ist gewesen da man von dient allev Jar an sand Michels tag sehs schillengphenning wienner gemainer munzz dem gotshaus des gueten herren sand Jorgen ze hertzogenbu^erch vnd aller der Samnung des selben gotshaus mit alle dem rechten vnd nuzz als wir ez haben herpracht ez sei gestift oder vngestift versueht oder vnversueht ze veld oder ze dorf ledichleich vnd vnverchumert. Dar vber pin ich der vorgenant Ott von grauenberd vnd ich vlreich der span von gaden des guetes des gotshaus ze hertzogenburch vnd der samnung des selben gotshaus scherm vnd geweren fuer all ansprach als aigens reht ist in dem land ze O^esterreich. wer aber daz daz wir in des scherm abgiengen von welcherlai sich fuegt daz des ob got wil nicht geschiecht was schaden sev des nemen an chost oder an mue dev sev muesten haben vmb daz guet den schull wir in ab legen vnd schullen daz haben auf alle dem vnd wir haben in dem land ze O^esterreich. vnd daz im dem gotshaus vnd der samnung ze hertzogenbu^erch diesev red stet vnd vnzebrochen beleib geb wir ich vorgenanter Ott von grauenberd vnd ich vlreich der span von gadem disen prief versigelt mit vnsern Insigeln ze einem offen v^erchund vnd ze einer steten sichherhait der sach. Des ist gezeug her Dietreich von Egendorf mit seinem insigel. vnd her wernhart von Nuzdorf. Alram auz der aw. Wolfger von wielantstal. Leupolt der Smitzperger. Andree der Richter vnd ander frum leut genueg den di Red wol chunt vnd gewizzen ist. Der prief ist gegeben do von Christes gepuerd warn ergangen Tausent Jar Drev hundert Jar vnd dar nach in dem Siben vnd zwaintzkistem Jar an sand Chrevtz Tag der do stet zwischen O^estern vnd Phingsten in dem Chlo^ester datz hertzogenbu^erch.

Source Fulltext: FAIGL, Herzogenburg (Wien 1886) S. 105-106