Ich Gundacher von Retelnperg vnd mein Hausuraw vnd alle vnser Erben wir veriehen an disem Prief vnd tuen chunt alle den die in sehent oder lesen horent die nu lebent vnd hernach chunftich sint Daz wir mit wol verdahtem muet vnd mit gunst aller vnserr pezten Vreunt zder zeit, do wir ez wol getuen mahten ge geben haben die Hueb dev da leit pei der Traysem dev vnser rehts aigen ist gewesen diu weilen der Haider von vns vnd von vnsern vodern ze Lehen hat gehabt dem Gotshaus des gueten Herren sand Georgen datz Hertzogenburch auf vnser Vrawn Alter mit alle dev vnd dar zve gehort ez sei gestift oder vngestift versueht oder vnversueht dar vmb daz man hin fuer ewichleich alle Samtzig Tag ein Mess sprehhen schol auf vnser Vraun Alter von der Chundung vnd sunderleich schol man deu selben Mess singen des Samtztag von isleicher Chotemmer wer aber daz daz ehaft nat iericht so schol ez in der selben Wohhen hin noch geschehen auf der vier A^elter ainem auf vnser Vraw^en Alter oder auf sand Georgen alter auf sand Augusteins alter oder auf sand Stephans alter vnd sei auch wir des vorgenanten guets scherm vnd gwer des egenanten gotshaus vnd der samnung des selben gotshaus fuer alle ansprach als aigens Reht ist in dem lant ze Osterreich wer auer daz wir in des scherms ab gieng swaz seu dez schaden nemen den schulle wir in an alle wider Red ablegen. Daz disev Red stat vnd vnzebrohhen beleib dar vber gib ich vorgenanter Gundacher disen Prief versigelt mit meinem Insigel ze einem offen v^erchund vnd zu einer sta^eten sicherhait diser sahh. Des sint gezeug her Chuenrat von Tiernstain her Wernhart von Nuzdorf vlreich von Lengenueld Olram auz der Awe Gotfrid von Ainod sein Prueder der leutolt vnd anderr piderber leut genueg den die sahh wol chunt ist vnd gewissen. Daz ist geschehen vnd der Prief gegeben do von Christs gepuert waren ergangen Tausent Jar dreu hundert Jar dar nach in dem Aht vnd zwaintzkisten Jar an sand Georgen Tag auf dem Haus datz Retelperg.

Source Fulltext: FAIGL, Herzogenburg (Wien 1886) S. 106-107