Ich Seyffreit von Neydowe vnd wir Ich vlreich Nychlos vnd Hadmar sein sune. Veriehen vnd Tvn chvnnt allen den die disen prief lesent oder horent lesen. Die nu lebent vnd her nach chunftich sint. Daz wir mit guten willen vnd gvnst vnserr erben. mit verdachten mute. Durch got vnd durch meiner lieben hovsvrowen sele willen, vron Margreten vnserr muter. der got gnade. vnd alle vnserr vodern sele willen. ze Troste zu der zeit do wir ez wol getun mochten. recht vnd redelichen geben vnd gemacht haben vnsers rechtes aygens vier wienner phenning geltes ewiges Purchrechtes. auff vnser vrowen Alter ze Panse ze einem ewigen selgerete die da ligent auff ainem halben lehen ze Chratendorff vnd daz wir Hadmarn von Pirbaum weiln verchovfft haben vnd seinen erben ze ainem rechtem Purchrechte. als er prief vnd hantfesten von vns dar vber hat versigelten mit vnsern Insigeln vnd haben im daz avfgeben mit vnserr hant als wir ze rechte scholden mit allem dem nvtze vnd rechte als sev vns der vorgenante Hadmar von Pirbaum vnd sein erben e davon gedient haben. also mit ovzgenomner rede, daz der vorgenante Hadmar von Pirbavm vnd sein erben oder swer daz vorgenante halbes lehen nach in besitzet furbaz ledechlichen alle iar an sand Georgen Tage die egenanten vier wienner phenninge davon diennen schol ze rechtem Gruntrechte dem erbern herren hern Jansen dem Pharrer ze Panse oder swer die vorgenanten Chirchen nach im besitzet ewichleichen da bei ze bleiben mit allem dem rechte als wir sev geben vnd gemacht haben an allen irresal die vorgenanten vier phenninge Gruntrechtes vnd durch pezzer sicherhait wand Chvnigunt mein Tochter vnser swester ze iren iaren nicht chomen vnd auch nach niht vogtper ist. Dar vber so setzen wir vns vnverschaidenlichen fur si vnd fur vns selber ze rechtem gewern vnd scherm für alle ansprache als Purchrehtes recht ist vnd des Landes recht ze Osterrich. vnd daz dise rede furbaz also stete sei vnd vntzebrochen beleibe Dar vber so geben wir dem vorgenanten Priester hern jansen vnd sein nahchomen dem Pharrer ze Panse disen prief ze ainem offen vrchunde vnd gezeuge vnd ze ainer ewigen vestnunge diser sache versigelten mit vnsern Insigeln. Diser prieff ist geben ze wienne nach Christes geburt Drevtzehen hundert jar dar nach in dem Nevn vnd zwaintzigistem jar an sand Lvceyn Tage.

Source Fulltext: FAIGL, Herzogenburg (Wien 1886) S. 107-108