Ich Rueger der Alachter vnd mein Hausvrow vrow Alhait veriehen an disem prief vnd tuen chunt allen den diu disen prief sechent oder hornt lesen diu nv lebent oder hernach chvnftich sint daz wir einen Hof haben gehabt datz Etzleinsperig ze rechtem Purchrecht van dem gotshaus ze Hertzogenburch vnd ist der selb hof aigen des selben gotshaus ze Hertzogenburch nv hab wir daz selb purchrecht ze chaufen gegeben an dem vorgenanten hof datz Etzleinsperig alz wir iz haben gehabt van dem gotshaus ze Hertzogenburch alz daz recht daz wir doran gehabt haben ze veld vnd ze dorf gestift oder vngestift versuecht oder vnuersuecht wie iz genant sei ich vnd mein hausvrow vrow Alhait vm anderthalb hvndert phvnt wienner phenning der wir recht vnd redleich gebert sein vnd hab wir im den selben hof aufgegeben dem vorgenanten gotshaus allz daz recht daz wir dran gehabt haben vnd ist daz geschechen mit aller vnser erben guetleichem willen vnd sei wir dez selben hofz ich vnd mein hausvrow vrow Alhait gewer vnd scherm fuer alle ansprach auf recht alz man purchrecht ze recht scherm schol alz lantzrecht in Osterreich vnd gewanhait ist vnd durch pesser gewishait vnd auch ze einner gantzen stett wir ich Gotfrid van ayno^ed vnd ich Jans von Potenprunn vnd Stephan von Neuwald vnd ich Fridreich der Harlante r lob wir mit vnsern trewn zv sampt Ruegern dem Alachter vnuerschaidenleich swaz an vnser ainem abgieng daz schullen sew auf dem andern haben der vorgenant her Herlieb Probst datz Hertzogenbu^erch vnd diu Samnung dez selben gotshaus nem auer dar vber daz selb gotshaus dhainen schaden an dem hof datz Etzleinsperig den in Ru^eger ze chauffen hat gegeben mit recht daz schull wir in allz ab legen an alle wider red. Daz lob wir bei vnser trewn tet wir dez nicht swer dann zter weil lantz Herre ist in Osterreich der schol in mit vnserm guetlichem willen in gantburten vnserz guetz so vil dem vor genanten Probst von Hertzogenburch vnd seim gotshaus waz er mit seinn trewn gesagen mecht swaz er schaden genamen an dem selben hof hiet mit recht den schull wir in gantz vnd gar ablegen an alle wider red. vnd daz diu red stett vnd vnzebrochen weleib. dor vber geb wir disen prief versigelten vnd bestetten mit vnsern Insigeln zv einer offen vrchvnd vnd zv einer statten sicherhait diser sachh. Ich Ru^eger mit meim insigel vnd ich Gotfrid mit meim Insigel vnd ich Jans mit meim insigel vnd ich Stephan von Newnbalt mit meim insigel vnd ich Fridreich der Harlanter wan ich nicht aigens iusigels han so pin ich des mit sampt in purgel alz iz vor geschriben stet an disen prief. Daz ist gesehen vnd der prief gegeben da van Christes gepuert warn ergangen Tausent iar drewhundert iar vnd dar nach in dem ains vnd dreizkisten iar an sand Georigen tag in dem Gotshaus datz Herczogenburch.

Source Fulltext: FAIGL, Herzogenburg (Wien 1886) S. 111-113