Ich Wolfker der Stalberger von Jvdenaw vnd mein Hausvrow vrow Offmey vnd vnser paider Erben wir ver iechen an diesem prief vnd tven chvnt allen den diu disen prief sechent oder hornt lesen diu nv lebent oder her nach chvnftich sind. daz wir dem Ebern Herren Hern Herliben Probst datz Herczogenburch vnd alle der samnvng des selben Gotshaus gelten schullen zainczk (sic) Phvnt Phenning wienner gemainer mvniz von Sand Gorgen tag der schirist chvftich ist vber zwai iar. nv hab wir in fur diu selben Phenning gesaczt der vor genanten Samnvng datz Herczogenburch vnserz rechten aigens funf vnd aidlef schiling geltz datz alten lengpach. vnd leit der selb gelt avf einner Mvle datz allten lengpach. vnd auf einnem halben lechen auf dem Haillant. an Sand Michels tag dient man von der mvl fvmthalb schillinch Phenning wienner mvniz vnd zwelif ches. vir ze weinachten vnd vir ze Ostern vnd virczk air vnd vir ches ze Phingsten vnd zwai hvener an Sand Michels tag vnd ein gans vnd zwai hverr zv vaschang. vnd von dem lechen dacz Haillant dient man Seczich Phenning vnd zwelif ches zv einner igleichen hochzeit vir, allz vor genant sind vnd virczk air ze Ostern vnd siwen hverr fvmfew an Sand Michels tag vnd zwai ze vaschang vnd schullen sew dew selben gullt in hawen mit alle dem recht vnd nvtz vnd wirz gehabt haben wer auer daz daz ich vorgenanter Wolfker der Stalberger vnd mein hausvrow vnd vnser paider Erben dew vorgenanten Samnvng ze Herczogenburch nicht werten an dem vorgenanten tag als er hie wenant ist an disem. so schol der vorgenant gult den wir in gesaczt hawen dann ledichleich ir sein mit vnserm guetleichem willen an allen chrieg. also claz wir dor an hinfuer ewichleich dhain recht nicht hawen schullen wann ich vorgenanter Wolfker der Stalberger vnd mein havsvrow vrow Offmey vnd vnser paider erben lowen mit vnsern trewn der vorgenanten Samnvng datz Herzogenburch daz wir der selben gult dew wir in gesaczt hawen gewer vnd auch scherm sein fuer alle ansprach allz aigens recht ist vnd Landes gewanhait in Osterreich. vnd auch zv einer pessern gewishait vnd zv einer gantzen stet lob ich vlreich der Sewech von Rawdnich mit meinen trewn daz ich der vorgenanten gult gewer vnd scherm bin des vorgenanten Gotshaus datz Herzogenburch mit sampt Wolfkern dem Stalberger vnverschaidenleich. swaz an ainnem ab gieng daz schullen sew auf dem andern hawen dew vorgenant Samnvng datz Herzogenburch. nem auer dar vber daz selb gotshaus dhainen schaden ann der selben gult datz alltenlengpach dew in Wolfker gegewen hat mit recht den schulle wir in allen ablegen an all wider red. tet wir des nicht swer dann ze ter zeit lantzfurst ist in Osterreich der schol in mit vnserm guetleichen willen in geantburten vnserz guetz so vil allz wir iz hawen in dem lant ze Osterreich vnd schullen sew daz selb guet so lang inne haben vntz daz wir in allz daz gelaisten allz hie iz verschriwen stet an disem prief. Daz dew red stet vnd vntzebrochen weleib dar vber gib ich vorgenanter Wolfker der Stalberger disen prief versigelten mit meinem insigel vnd ich vlreich der Sewech mit meinem insigel zv einem offen vrchvnd vnd zv einer steten sicherhait diser sachh. Daz ist geschechen vnd der prief gegewen da von Christes gepurd ergangen warn drewczechen hundert Jar. dar nach in dem ainz vnd dreizkisten Jar an Sand Margreten tag in dem Gotshaus dacz Herczogenburch.

Source Fulltext: FAIGL, Herzogenburg (Wien 1886) S. 118-120