Ich Wolfker von wielanstal vnd mein hausvrow vrow Gedraut vnd vnser paider Chind wir veriehen an disem prief vnd tven chvnt allen den diu disen prief sechent oder hornt lesen. dew nv lewent oder her noch chvnftich sind, daz wir von der samnung des gotshaus datz Hertzogenburch gehabt haben irz rechten aigens einen hof datz wielanstal vnd hab wir denselben hof von in gehabt ze rechtem purchrecht. Nv hat vns der Erber Herre Her Herlieb zv den zeiten Probst datz Hertzogenburch vnd alle diu samnung des selben gotshaus diu vorgenanten aigenschaft lauterleich vnd gentzleich gegeben mir vnd meiner hausvrowen vnd vnser paider Chinden mit alle dem recht vnd sews gehabt habent also weschaidenleich daz ich in ze widerbechsel gegeben han meinz rechten aigens einen Hof datz Meinhartzdorf mit alle dem recht vnd auch nvtz vnd ich in vnd mein erben gehabt haben ze veld vnd ze dorff gestift oder vngestift versuecht oder vnversuecht swie daz genant sei wann ich vorgenanter Wolfker vnd mein Hausvrow vrow Gedraut vnd vnser paider Erben lowen mit vnsern trewn dem vorgenanten Hern Herlieben Probst datz Herczogenburch vnd alle der samnung des selben Gotshaus. daz wir des selben hofz gewer vnd auch scherm sein fuer alle ansprach allz aigens recht ist vnd Landes gewanhait in Osterreich. vnd auch zv einer pessern gewishait vnd zv einer gantzen stet lob wir Gotfrid vnd Nyclo vnd vlreich vnd Hainreich diu Sewekchen mit vnsern trewn daz wir des vorgenanten hofz gewer vnd auch scherm sein des vorgenanten gotshaus dacz Herczogenburch mit sampt wolfkern von wielanstal vnverschaidenleich swaz an ainnen abgieng daz schvllen sew auf dem andern haben dew vor genant samnvng datz Herczogenburch. nem aver dar vber daz selb gotshaus dhainen schaden ann dem hof datz Meinhartzstorf den in wolfker von wielanstal gegewen hat mit recht den schulle wir in allen ab legen an alle wider red. tet wir des nicht swer dann zter zeit Lantzfvrst ist der schol mit vnserm guetleichen willen in gantburten vnsers gu^etz so vil alz wir iz haben in dem Lant ze Osterreich vnd schvllen sew daz selb guet so lang inne haben vntz daz wir in allz daz gelaisten allz iz hie verschriwen stet an disem prief. Daz diu red stet vnd vntzebrochen beleib dar vber gib ich vorgenanter wolfker von wielanstal disen prief versigelten mit meinem insigel vnd ich Gotfrid der Sewekch mit meinem insigel vnd ich Nycla der Sewekch mit meinem insigel vnd ich vlreich der Sewekch mit meinem insigel vnd Hainreich der Sewekch mit meinem insigel zv einnem offen vrchvnd vnd zv einer steten sichherhait diser sachh. Daz ist geschechen vnd der prief gegeben da van Christes gepvrd ergangen warn drewczehen hvndert lar dar nach in dem ainz vnd dreiskisten lar an dem awfertag in dem gotshaus ze Herczogenburch.

Source Fulltext: FAIGL, Herzogenburg (Wien 1886) S. 114-115