Ich Levpolt der smidezperger vnd Ich vrow Gatrei sein Hausvraw vnd vnser paider erben veriehen vnd tuen chvnt allen den die disen prief lesen oder ho^erent lesen daz wir mit vnser erben gueten willen vnd mit vnser naechsten vreund rat ze der zeit do wir ez wol getuen mochten verchauft haben vnserz rechten vreien aigenz ainen hof der do haiset Haigart vnd ist gelegen zwisschen Oberndorf vnd Phaefphing mit alle dev vnd dor zu^e geho^ert ze veld vnd ze dorf gestift vnd vngestift versuecht vnd vnversuecht dem erbern herren Probst Herlieb vnd sand Jùrgen gotshause ze Hertzogenburch vmb ocht vnd dreisich phunt phenninge der wir gor vnd gantz gewert sein. Vnd sei auch wir Ich vorgenanter Levpolt vnd Ich vrow Gatrei sein hausvraw vnd vnser paider erben dez genanten hofz recht scherm vnd gewer vor alle ansprach alz aigenz recht ist vnd dez landez ze O^esterreich. Vnd waz dem vorgenanten Propst vnd dem gotshause dor an abgieng mit recht daz schullen si haben auf vns vnd auf alle dev vnd wir haben in dem lande ze O^esterreich. Vnd daz in daz ebichleich staet vnd vntzerbrochen beleib vnd ze ainer staeten vestetigung vnd sicherhait gib ich in ich vor genanter Levpolt Smidezperger disen prief versigelt mit meim insigel vnd mit meins prueder Hainreichz insigel vnd seit mein aidem ..... . . *) nicht aigenz insigelz hat, so gib ich in mit dez erbern Herren insigel hern Weichartz von Toppel disen prief die zevg sint dieser sache mit iren insigeln. Der prief ist gegeben ze Hertzogenburch nach Christez gepurd drevczehenhundert Jar dar nach in dem ainzmidreisigisten iar an sand Ju^orgen tag.

Source Fulltext: FAIGL, Herzogenburg (Wien 1886) S. 113-114