Ich Cholman von Ramsenpach vnd mein Hausvrow vrow Katrei vnd vnser Paider Erben wir ver iehen an disem prief vnd tuen chvnt allen den diu in sechent oder horent lesen dew nv lewent oder her nach chvmftich sind daz wir von der samnvng des gotshaus datz Herczogenburch gehabt hawen ierz rechten aygens ein Drittayl an einem Hof ze wielastal da wir in von gedient hawen alle Jar einen mutt traytz vnd fvmffzechen Phenning von einer hofstat vnd zwen Phenning von einem weingarten wienner gemainer mvniz daz wir alz von in gehabt hawen ze rechtem Pvrchrecht nv hat vns der Erber Herre Her Herlieb zv den zeiten Probst dacz Herczogenburch vnd alle dew Samnvng des selben gotshaus dew vorgenant aigenschaft lauterleich vnd gentzleich gegewen mir vnd meiner Hawsvrawn vnd vnser paider erben mit alle dem recht vnd auch nvtz vnd sewz vnd ir gotshaus gehabt hawent also weschaidenleich daz wir in der vorgenanten samnvng dez gotshaus ze Herczogenburch ze widerwechsel gegewen hawen vnserz rechten aygens ein lechen auf dem mothokhen vnd leit in Pischolfsteter Pharr vnd auf dem selben lechen ein Phunt Phenning geltz vnd achzechen Phenning auf vberlent. dew ligent in der aw pei der Traisem. da der Chaiser gesezzen ist. dew selben gult allew gew wir in mit alle dem recht vnd auch nvtz vnd wirz vnd vnser erben gehabt hawen ze veld vnd ze dorf gestift oder vngestift versuecht oder vnversuech swie daz genant sei vnd wann ich vorgenanter Cholman vnd mein Hausvraw vraw Katrei vnd vnser paider erben gelopt hawen mit vnsern trewn dem vorgenanten Probst Herlieben ze Herczogenburch vnd alle der samnvng des selben gotshaus daz wir des selben guetz scherm vnd gewer sein fuer alle ansprach als aygens recht ist vnd Landes gewanhait in Osterreich. nem auer dar vber daz selb gotshaus dhainen schaden an dem lechen auf dem mothokchen vnd an der gu^elt in der aw dew wir in gegewen hawen. mit recht, den schulle wir in allen ablegen an alle wider red. tet wir des nicht swer dann zter zeit lantz fuerst ist in Osterreich oder sin ver weser der seinnen gewalt hat der schol in mit vnserm guetleichen willen in gantburten vnserz guetz so vil alz wir iz hawen in dem lant ze Osterreich. vnd schullen sew daz selb guet so lang inne hawen vntz daz wir in allz daz gelaisten alz iz hie verschriwen stet an disem prief. Daz diu red stet vnd vnzebrochen beleib dar vber gib ich vorgenanter Cholman disen prief versigelt mit meinem insigel zv einem offem vrchvnd vnd zv einer steten sicherhait diser sachh. Der sachh ist auch gezeug mein geswei welker von wielanstal mit sampt mir der auch sein insigel daran let. Daz ist gesehen vnd der prief gegewen da von Christes gepurd ergangen warn Drewczechen hvndert Jar dar nach in dem zwai vnd dreizkisten Jar des nachsten Svntagz vor den Phingsten in dem gotshaus ze Herczogenburch.

Source Fulltext: FAIGL, Herzogenburg (Wien 1886) S. 123