Ich Wernhart von Nusdorf vergich vnd tuen chunt allen den die disen prief sehent oder ho^ernt lesen die nu lebent oder her nach chunftich sint. Daz mier der erber herre Probst Herlieb sand Goergen gotzhauss datz Herczogenburch vnd alle die samnung des selben gotzhauss die genad habent getan durich gotes lieb vnd durich hail meiner sel vnd meiner vo^edern sel vnd durich rechte andacht dem gotshaus datz Nusdorf daz seu mier habent geben zwen Chorherren die ewichleich got schullen dienn vnd dem heiligen herren sand Johans datz Nusdorf vnd den andern gnaedigen heiligen die do rastun sint mit allem Pherrleihem recht vnd schullen auch seu einn laiphaffen pei in do haben hinfuer ewichleich der auch got vnd den heiligen do dien vnd dem gotshaus. Waer auer daz der selb layphaff nicht endleich wer. vnd dem gotshaus niht fuegleich wer. swer dann obrister pharrer ist vnder den zwain chorherren datz Nusdorf der schol den selben layphaffen verchern vnd schol einn andern layphaffen nemen einen endhaften man der im vnd dem gotshaus nutz vnd guet sei. Vnd schullen auch sev in der Chappeln datz Nusdorf die geweicht ist in den ern sand Katrein alle wochen vier Messe habn. an dem Suntag vnd an dem Mentag vnd an dem Mitichen vnd an dem Vreitag hinfuer ewichleich. Vnd schullen auch seu datz Nuzdorf in dem Cho^er alle tag ein messe habn hinfuer ewichleich. Vnd schullen auch die vorgenanten herren hinfuer ewichleich zten obristen ho^echzeiten dez Obentz vesper singen vnd dez morgens Metten. vnd schullen auch die selben herren Vesper vnd Mettein singen hinfuer ewichleich. An sand lohans tag. vnd an sand Merten tag. vnd an sand Katrein tag in dem vorgenanten gotzhaus datz Nuzdorf. Vnd schullen auch alle Veirtag Mettein sprechen in der Chirichen datz Nusdorf. Vnd dar vm daz mier der erber herre Probst Herlieb datz Herzogenburg vnd alle sein samnung die gnad habent getan, daz seu die andacht vnd den gotsdienst datz Nusdorf gemert habent mer denn emaln da gewesen ist. Dar vm so han ich in ze ierem gotshaus hintz Nusdorf zehen phunt geltz gegeben zv den zwaintzk phunten geltz die ich in e gegeben han. Vnd han in auch in gegeben die Waitz gu^olt datz Chueffarn do man alle iar von dient zehen phenning auf sand Nyclos alter hintz Herczogenburch. Vnd han in gegeben daz weinzu^erlgricht datz Nuzdorf do Gyling aufsitzt vnd den Weingarten der in daz selb weinczuerlgricht geho^ert. Die Waitz gu^elt vnd daz weinczuerlgricht als iz hie genant ist an dem prief. swer zten zeiten obrister pharrer ist datz Nuzdorf der schol mier von dem selben guet alle ierichleich an meinem iartag tailn Wein Pro^et vnd Vleisch^4ô swaz von dem selben guet nutz cho^emen mag, daz schol er mier tailn noch seinn treun. Vnd schullen auch die vo^ergenanten herren von Nuzdorf meiner sel vnd meiner vo^edern sel vnd meiner affterchunft sel gedenchen in allen ieren tagzeiten vnd in allen iern Messen in dem vorgenanten gotshaus datz Nuzdorf. Daz guet als iz hie benant ist. daz han ich vorgenanter Wernhart von Nusdorf gegeben dem gueten herren sand lohans vnd den andern gnaedigen heiligen die do rastund sint in dem selben gotshaus ledichleichen vnd vreileichen mit meiner hausvrowen vron Agnesen vnd mit aller meiner chind gùetleihen willen, vnd han auch daz selb guet gechaufft vm mein recht varntguet wand iz meiner chind Erb nicht ist. Vnd schol auch der vorgenant her Herlieb Probst datz Herczogenburch vnd alle die samnung oder swer do hinfuer ewichleich Probst ist dem gotzhaus datz Nuzdorf allez dez guetes dez ich vorgenanter Wernhart dar gegeben han nicht enziehen noch zv ierem Chloster nicht nemen wand iz ewichleich do pei weleiben schol. daz habent seu mier gelubt mit iern treun. Vnd allez daz daz hie vor verschriben stet an dem prief daz schullen sev mier vnd allen meinn erben vnd dem gotzhaus datz Nuzdorf gantz vnd gar stet wehalten an all wider rede an allen chrieg. daz habent seu mier auch gelubt mir iern treun. Taeten auer seu dez nicht swer dann zten zeiten Pischolf datz Passau ist. oder des pischtuems verweser an seiner stat der schol seu mit seim gwalt vnd mit dem Pann mit ierm guetleihen willen dar zue twingen daz seu mier vnd meinn erben vnd dem gotshaus datz Nuzdorf allez daz stet wehalten daz vor verschriben stet an dem prief. Daz diseu red stet vnd vnzebrochen weleib dar vber gib ich Wernhart dem vorgenanten hern Herlieben Probst datz Herczogenburch vnd der samnung disen prief versigelt mit meinem anhangunden Insigel ze einer ewigen bestetigunge diser sache. Der prief ist gebn datz Hertzogenburch in dem Chlo^ester. do man von Christes gepuert zalt Dreuzehenhundert iar. dar nach in dem fu^emf vnd dreizzkisten iar dez Suntags in den viertagen inder Vasten.

Source Fulltext: FAIGL, Herzogenburg (Wien 1886) S. 133-136