Wir Herlieb van gots gnaden Probst sant Goergen gotshaus datz Hertzogenburch veriehen vnd tu^en chvnt alln den die disen prief an sehent lesent oder hoernt lesen die nv lebent vnd her nach chunftich werent. Daz wir mit wolverdachtem mu^et vnd mit ganczem willen zv der zeit do wir iz wol getuen machten durch vnserr sel vnd aller vnserr vadern sel willen Vnsern herren vnd pruedern vnsers Conuents haben gegeben vnsers guets daz wir van vnserr pfruent vnd auch van den amten die wir gehabt haben ee wir Probst wuerden ver spart haben daz wir wol verzert hieten di weil wier ainuoltiger prueder vnd auch amtman des gotshaus sein gewesen. Wir haben in gegeben ewichleich ze haben, sechtczk Metzen charen vnd sechtczk Metzen Gersten vnd dreizk Metzen habern Poeltinger mazz. die man dient als trayddienst recht ist vnd zehen schilling pchennig dienst an newn phennig wienner munizze die man dinet an sant Michels tag vnd ligent datz Hewnn auf drithalben lehen, vnd auf ainer hofstat vnd dreizk pchennig ligent sein auf vber lent do selbs. vnd vier metzen waitcz vnd ain mecz charen vnd virtzk pchennig wienner fur faschanch huenrr die man dient ze der Liechtmisse vnd ligent auf purchrecht echern pei der Traisen vm Ossarn. Vmm die selben gult. schol man Parihant chauffen alle iar daz man ze Pluem Aestern dem Prelat ain gancz parihant geb. vnd iegleichem Char herren schol man ein halbs parihant geben. Wir haben auch in geben drithalb pchunt pchennig gelts vnd acht phennig wienner munizze die man dient halb an sant Georgen tag vnd halb an sant Michelstag. vnd ligent pei sant Ceciligen auf dem zehent hof. vmm die gult schullen sew vnsers herren leichnam tag begen mit aller schoenhait mit singen vnd mit lesen, als sein werder leichnam des wol wierdich ist. Wir geben auch in drew pchunt gelts pchennig wienner munizz die man dient an sant Michels tag vnd ligent pei Ossarn vnd vm die zwai winden vnd vm sant andree pei der Traisem auf vber lent. dar vmm schullen sew vnser vrawen der ewigen magt ze lob vnd ze eren all nacht nach Complet singen die Antiffen: Speciosa facta es et swavis . . . Wir geben auch in ain pchunt pchennig gelts wienner munizze. daz leit dactz Rechgraben auf aim lehen daz man dient an sant Michels tag dar vmm schullen sew sant Annen tag hachzeitleichen begen. mit singen vnd mit lesen ze aller tag zeit als si des wol wierdich ist. Wir geben auch in zehen schilling pchennig gelts wienner munizze die liegent pei Pottenprunn auf ainer mul die man dient an sant Michels tag. dar vmm schullen sew sant Elspeten tag scho^en begen mit singen vnd mit lesen ze aller tag zeit. Wir geben auch in zwelif schilling pchennig gelts wienner munizze die man dient an sant Michelstag vnd ligent auf dem Haillant pei Alten lengpach auf ainer mul. vnd auf zwain lehen. dar vm schullen sew begen drei Jarteg mit vigili vnd mit sel mess als andern erberen leuten. den ersten vnsers vater sel herrn Herliebs van der m u 1. den andern vnserer mueter sel vron Mechthilden die sein hausvrawe gebesen ist den dritten vnserr swester vron Perichten sel der Fizzlingerin den got allen genad. Wir geben in auch Neun phunt phenning gelts vnd vier vnd zwainczk phenning wienner munizze. daz sew ledichleich alle tag ain mess schullen lesen auf gots leichnam allter in der Chapellen in dem Capitel. die wir gestift haben got ze lob vnd ze eren vns vnd allen vnsern vadern seln ze hilf vnd ze Trost. die selben gult ligent datz Zelderndorf auf zwain lehen das ain dient zwen vnd zwainczk metczen waitcz vnd vier vnd zwainzk metzen Gersten vnd dreizk metczen habern Egenburger mazze vnd schehs schilling phenning vnd sechs pchennig wienner munizze. die man dient an sant Goergen tag. daz ander lehen dient Sechtzehen metczen waitcz vnd sechtzehen metczen gersten vnd vier vnd zwainczk metczen habern Egenburger mazz vnd sechs schilling vnd sechs pchennig wienner munizze die man dient an sant Goergen tag. vnd zehen pchennig wienner munizze die man dient an sant Michels tag van ainem Weingarten, der gehoert in daz ander lehen. vnd ligent auf drin hofsteten vnd auf vber lent datz Salichendorf. do dient man van Suben schilling pchennig wienner munizze. fumf schilling an sant Poelten tag vnd Sechczk an sant Michels tag vnd ligent auf ainem halben lehen datcz Steten pei der Persnich. do dient man van drei vnd zwainczk metczen Charns vnd drei vnd zwainczk metzen habern Poeltinger mazze vnd dient an sant Michelstag sechtczk pchennig wienner munizze vnd ligent auf vberlent datcz hewnn fiertczk pchennig von ainer wis vnd van ainem acher vnd zehen pchennig van ainem acher leit datcz Obern Retelperg die man dient an sant Michelstag vnd ligent auf zwain Jeuchen weingarten vnd auf ainem viertail datcz Inzesdorf. der sind fumf viertail purchrecht van dem erbern hern hern Rudolfen von Liechtenstain. vnd dient ainsmeviertzk phennig an sant Michelstag vnd ain halber weingart ist purchrecht van der Aptessine van Erlach chlaster. vnd dient funftzehen pchennig an sant Michelstag vnd ain halber weingarten ist purchrecht van dem prelat ze Herczogenburch. der dient auch funfzehen pchennig an sant Michels tag vnd ligent auf ainer wis in der awe pei der Traisem. dev ist purchrecht van dem Aptt van sant Marein Cell. vnd dient fumf phennig an sant Gilgen tag. Waz der gult mer ist. denn newn pchunt vnd vier vnd zwaiczk pchennig. do van schol man den herren dreu phunt phennig dienn alle iar vm des Teusenperger iartag hern Artliebs dem got genad. vnd swaz sein vbrig ist daz schol man zv dem parihant gult nemen. vnd swo vnserr stiftung icht abgieng daz daz als ervolt wert. Vnd schol auch chainrr Prelat mit der gult nicht ze schaffen haben denn wem sew der Techent vnd die herren von dem Convent enpchelichent. Vnd daz vnser stiftung also stet vnd vnzebrochen furbaz beleib dar vber geb wir vnsern herren vnd pruedern disen prief zv einem offen vrchund. vnd zv eim waren zeug diser sahh. versigelt mit vnserm Insigel. vnd mit des Conuents Insigel. Vnd sind des zeug di erbern herren Probst Dietmar von sant Poelten mit seim insigel. Probst Haug van sant Andree mit seim insigel. her R ein bot der Techent, her Chunrat von Eagcz her Seifrid von streczing, her herwort der payr her lans van Cherten. her Gunther der pfarrer her Chvnrat der zvchswert. her Andre, her Nicla. her Chunrat der Loechler. her Goerg der Siechmaister. her Fridreich. her Ott. her Jans. her Chunrat. her Hierz. her leb. vnd ander erber leut genuch den di sachh wol chunt vnd gwizzen ist. Der prief ist geben do man zalt van vnsers herren Jesv Christi gepuerd Dreuzehen hundert iar dar nach im fiertczkisten iar an dem Pericht tag. datcz Herczogenburch in dem gotshaus.

Source Fulltext: FAIGL, Herzogenburg (Wien 1886) S. 153-156