Ich Alber von Maynberch. vnd ich Margret sein Havsfrowe. Wir veriehen offenbar an dem brief allen den di in lesent sehent oder ho^erent lesen di nv lebent oder hernach chunftig sint. Daz wir zden tzeiten do wir ez wol getv^en mochten haben gegeben Hainreichen von Huelz meiner hausfrowen Ohaim vnd seinen Erben vnsern tail an dem hof datz Etzleisperig. der mein vorgenante havsfrowen an erben schol nach irr mu^eter tovd vrowen Olhaiten hern Vlreichz Witibe von Ternberch dem got genad. vmb zehen phunt phenning wienner mu^enzze. der wir recht vnd redleich gewert sein. Vnd waz tzu dem egenanten hof gehoret an pawe an holtz an wismat an hofsteten an Pavnga^erten vnd an Aechern vnd waz man dar in dienet von den weingarten di da ligent in dem hesental. vnd waz dienstz in den vorgenanten hof geho^eret, also daz der egenant Hainreich von Hvlz vnd sein Erben allen irn frum damit schaffen mit verchauffen mit versetzen vnd geben wem si wellen mit vnserm gu^oten willen. Wir veriehen auch ich vorgenanter Alber von Mainberch vnd ich Margret sein Havsfrowe. daz wir auf den egenanten hof chain ansprach nicht mer haben. Vnd daz di red stet vnd vnzebrochen beleib gib ich Alber von Mainberch den prief versigelten mit meinem Insigel. vnd mit der Erbern herren Insigel. hern Ottenz von Walt. vnd hern fridreichz von Atzenprug. di der red zeug sint mit irn Insigeln. Der brief ist geben zu Mainberch. Nach Christes geburd Dreutzehen hundert lar dar nach in dem fumf vnd viertzgisten lar an Sand Gerigen Tag.

Source Fulltext: FAIGL, Herzogenburg (Wien 1886) S. 176-177