Ich Hainreich der Svmeravwer von Hochenberch vergich vnd tuen chvnt allen den dev den Prief an sehent lesent oder horent lesen. die nv lebent vnd her nach chvnftig sint. Daz ich mit meiner hausvrovn vron Margreten gueten willen vnd mit gvnst aller vnser Erben ze der zeit do wier ez wol getuen machten ze chauffen haben gegeben ein Halbez Lehen datz obern Merching vnd daz selb halb Lehen dient alle lar an sand Mychels tag drey schilling phening wienner mvnizze, vnd aecht phening fu^er ain Gans vnd fu^er zway Heribst Hvener vnd aecht phening fu^er zway Vaschanch Hvener. Vnd ze Weichnachten vnd ze Ostern vnd ze Phingsten stet zechen Ches oder ie fuer der Ches vier phening. daz wir ^e gechauffet haben vmb vnser aygenhaft guet von Hainreichen von Svmeraw, vnd viertzehen phenning geltz auf vberlent do selbs die man avch dient an sand Michelstag daz vnser recht vreies aygen gewesen ist. dem erbern Gotzhaus des gueten Herren sand Georgen ze Herzogenburch besunderleich den Cho^erherren auf ier Oblay vmb Viertzehen Phvnd vnd vmb Sechzig Phenn. wienner Mvnizz. der wier redleich vnd recht gewert vnd verricht sein. Daz sev furbaz daz vorbenant guet schullen inne haben mit allen dem recht vnd nvtz als ez vnser vodern vnd wier selben her haben pracht, allen iren frum do mit schaffen als mit anderem ierem aigen an allen ierresal ez sei gestift oder vngestift versuecht oder vnversuecht ze velde vnd ze dorffe. Dor vber ze pezzer sicherhait setze wier vns ich vorgeschribner Hainreich der Svmerawer vnd ich Margret sein Hausvrowe vnd vnser paider Erben dem ebenanten Gotshaus vnd der Samnvng ze Hertzogenburch ze rechtem scherm vnd gwer fuer alle ansprach als aigens recht ist in dem Lant ze Osterrich. . . . Daz dev red vnd die wandlung vnzeprochen beleib dor vber gib ich vorgenanter Hainreich der Svmerawer dem vorgenanten Gotshaus vnd den Chorherren ze Hertzogenburch den prief ze einem gezevge vnd ze einer staetichait der sache versigelt vnd bestaetet mit meinem Insigel vnd sint des gezevgen. Her Stephan von Hochenberch mit seinem Insigel, vnd mit Stephans, Stephan Guetmans Svn von Holnburch meiner Hausvrovn prueder Insigel. Vnd ander erber Levt den dev sach wol chvnt ist. Der prief ist gegeben noch Christes gepuert vber Drevzehen Hvndert lar dar nach in dem fvmf vnd viertzgisten lar an sand Merten tag.

Source Fulltext: FAIGL, Herzogenburg (Wien 1886) S. 179-180