Ich Symon der wechsler Puriger ze Tuln vnd ich Wentel sein Hausfrow vnd vnser erben veriehen vnd tuen chvnt allen den die disen Prief an sechent oder horent lesen die nv lebent vnd hernach chvnftich werdent, daz wir mit guetem willen vnd mit wol verdachtem muet vnd Rat vnser pesten frevnt vnd mit gueter Gvnst aller vnser Erben vnd mit gesampter hant zue der zeit do wir iz wol mo^echten getvn, Geben vnd machen dem Erbern Herren dem Probst hintz Hertzogenburch vnd sinem Goteshaus auf vnsern drin Heusern die wir haben ze Tuln vnd gelegen sint in der Chram Gazzen vnd geraint sint an Stephans des sporrer haus ze nachst ain halbes phvnt geltes wienner pfenninge die ee gelegen sint auf der vischamvnder Haus daz nu Nachim der lud ze Tullen inne hat vnd daz egenant»halp phvnt geltes haben wir dem vorgenanten Probst hintz Hertzogenburch vnd sinem Goteshaus gegeben vnd gemacht vf vnsern egeschriben drin Hevssern mit vnsers Genedigen grvntherren willen Hern Hainriches des Techentz zue den zeiten Ertzpriester vnd Pharrer ze Tuln der vnser dreier Heuser ze den zeiten Rechter Grvnt Herre waz wan seu im vnd sinem Gotes haus dinent aller ierigleich dreutzechenthalben wienner phenninge ze Grvntrecht vnd nicht mer an dem Prechemtag vnd Stephannen dem sporrer zwelife pfenninge ze Purchrecht an sant Mychels tag auch der vorgenanten Mvnizze. vnd daz vor geschriben halp phvnt geltes haben wir verschriben vnd gemacht auf vnsereu dreu Heusser auf daz chloster hintz Hertzogenburch also mit ausgenomner vnd beschaidner Red wenne wir in ein ander halbez phvnt geltes chovffen des seu selber stifter vnd storer sein als anders yres aygens. so schol das oft genant halp phvnt geltes ab vnsern drin Heussern ledich vnd vrei worden sein an allen chrieg vnd irrvng. alle die weil dez nicht geschicht so schullen wirz dem oft genanten Chloster hintz Hertzogenburch dienen aller ierigleich an sand Jorigen tag als purchrechts recht ist vnd gewonhait in dem lande in Osterreich. Vnd loben in daz ze laisten mit vnsern trewen an aytes stat. vnd schullen is dennoch haben auf allem vnserm Guet vnd ich Symon der wechsler vnd mein Erben haben in dem lande in Osterreich. Vnd daz diseu Red also stet vnd vnverchert beleibe des gib ich dem Probst von Hertzogenburch vnd sinem Goteshovs disen Offen prief ze vrchunde vnd zu einem waren gezeug diser sache versigelten mit meinem aygen anhangunden Insigel. vnd ist dennoch dar zue gezeuge an dem prief mit seinem Insigel der Erber vnd der wirdig herre Her Hainreich der Techent pharrer ze Tuln vnd her franciscus puriger ze Tuln auch mit sinem Insigel die ich paide vleizichleich darumbe gepeten han. Diser prief ist geben ze Tuln do man zalt von Christes gepurt Dreutzechen Hvndert jar vnd in dem Syben vnd viertzigisten iar dez negsten Eritags nach aller Heiligen tag.

Source Fulltext: FAIGL, Herzogenburg (Wien 1886) S. 187-188