Ich Pergner vrleugs sun von Drosendorf vnd alle mein Erben. vergehen offentleich an disem prief allen den di in sehent oder horent lesen die nu lebent vnd hernach chunftig sint das wir nach Rat vnd Weisung vnser genedigen herren hern Eberhartz vnd hern hainreichs von walse zv den zeiten hauptleut ze Drosendorf vnd nach Rat vnser besten freund di Ansprach vnd alle dev Recht dev wir gehapt haben an dem zehenthof datz Hard den wir heten von sant Jeorgen Gotzhaus ze hertzogenburch vnd wir des ein vrchund heten von dem selben Gotzhaus freuntleichen vnd guetleichen verzigen vnd aufgegeben haben dem Erbern gaistleichen herren Probst Seyfriden vnd der Samnung gemaincleich des vorgenanten Gotzhaus ze Hertzogenburch also das wir fu^erbas hintz dem egenanten Zehenthof noch hintz allen den zehent. noch hintz alle dev. daz dar zv geho^ert hat wie so daz genant ist. Nymmer mer chain ansprach gehaben schu^ellen, wann der vorgenant herre der Probst vnd dev Samnung des egenanten Gotzhaus allen irn frumen schaffen schu^ellen mit dem vorgenanten hof vnd mit alle dev vnd dar zv^e geho^ert mit versetzen mit verchaufen wie iz in aller best fuegt ann all hindrung vnd an allen irsal. wann der vorgenant hof vnd die zehent mir vorgenanten Pergner vnd meinen erben ganz vnd gar vergolten sind, vnd di vorgenanten vrchu^end auz meiner gewalt dem egenanten herren dem Probst vnd der Samnung gegeben han. Das die red stet vnd vnzeprochen beleib wanne ich aygens Insigels nit enhan Dar vmb so han ich gebeten die Erbern mein genedig Herren hern Eberhart vnd hern hainrich von walse ze Drosendorf, das si dem vorgenanten herren dem Probst vnd der Samnung disen prief besteten vnd versigeln mit irn anhangunden Insigeln zv^e einem waren v^erchund vnd zv^e einer gantzen sicherhait der vorgeschriben sache. der vorgenanten wandlung ist zeug Herman Gremel ze den zeiten Purgraf ze Drosendorf mit seinem anhangunden Insigel. Der prief ist geben nach Christes gebu^erd v^eber dreuzehenhundert jar vnd dar nach in dem ains vnd fv^enfzigistem jar des Samstags vor mitteruasten.

Source Fulltext: FAIGL, Herzogenburg (Wien 1886) S. 196-197