Ich Wernhart von Nvsdorf vnd mein erben, vnd ich Chvnrad von Vreuntzhausen vnd ich Wolfker der Reichilsperger vnd ich ffo^elkel von Go^ezcestorf vnd ich Leb, hern Lebn svn von Vreuntzhausen vnd all vnser erben. Wier veriehen o^effenlich an disem prief alln den diev in lesen oder ho^erent lesen. daz wir mit wol verdachtem mvet vnd noch rat vnser vreund zcu der zceit do wir iz wol getuen mochten ze chovffen habn gegebn vnsers rechten freizz aigens daz vns anerstorben ist von vnserr rechten mvemen vron Margarethen von Prunn der got gnade zechen schilling gelts diev man dient all iar an Sand Mychahels tag. vnd leit ovch daz vor gnante gelt ze Chvefarn auf einem lehen, dar auf gesessen ist Rveger an dem ortt. daz vor gnante gelt als iz do gelegen ist vnd als wir iz in aigens gewer her pracht haben vnd vraw vron Margarethe von der vns iz ist ledich worden, also hab wir iz gebn an all irrung vnserr erben den erbern Chorhern vnd der Samnung dez Conuents sand Go^ergen Gotshaus ze Herzcogenburch auf ir Oblai an dreisk vm Su^ebnzcehent halb pfunt wienner phenning der sicv vns schon gewert habnt zcu rechten taegn vnd sein ovch wir der vor gnanten gu^eld wir vor gnanten fu^enf ir scherm vnd gewer vor allen anspruch als landes recht in O^esterreich ist. naemen auer sicv daran chainen schaden mit rechte den schull wir in ab legen an allen chrieg vnd schullen siev daz habn datz vns vnd auf dem guet daz wir yndert habn in dem lant ze O^estereich oder lasen mit vnserm guetleichen willen wir sein lebnting oder tot. daz verhaiss wir in ich vor gnanter Wernhart vnd Chvnrad vnd Wolfker vnd ffo^elkel vnd Leb von Vreuntzhausen mit vnsern treuwen an alles geuaer. zcu einer pesser sicherhait vnd waren gezceug der sach geb wir im disen prief versigelt mit vnser vorgnanten anhangunden ingesigele. Der prief ist gegebn do man zcalt noch Gots gepu^erd drevzcehen hundert iar dar nach in dem ffvnfzcigsten iar an sand Margarethen tag.

Source Fulltext: FAIGL, Herzogenburg (Wien 1886) S.193-194