Ich Weygel von Teyau vergich offenleich vnd tun chund allen den di disen prief sehent horen oder lesen di nu lebent vnd hernach chumftig sind daz ich vnd all mein erben den halben czehent hof ze Teyau vnd all di zehent halb di von alter dar in geho^ernt di ich gechauft het wider Stephan den Rausch vnd di der vorgenant Rausch gechauft het wider gilign mit allen den rechten vnd nutzen vnd ich sev vnd mein vorgenant geber von sand Joerigen gotzhaus ze Hertzogenwurch gehabt haben alz di vrchund sagt die wier dar vber heten Nach rat meiner pesten vreund ze der zeit da ichz wol getu^en mocht Recht vnd redleich verchauft han dem erbern gaistlaichen Hern Probst Seyfriden vnd der Samnung gemainchleich sand lo^erign gotzhaus ze Hertzogenwurch vmb fierczig phund wienner phenning der ich ganz vnd gar gericht vnd gebert pin den egenanten halben zehenthof vnd all di zehent halb di dar zu gehornt mit alln nu^eczen vnd rechten vnd gewonhait di von alter dor auf gewesen sind wesuecht vnd vnbesu^echt wie si genant sind han ich vnd all mein erben dem obgenanten gotzhaus gegeben fu^er ein ledich gu^et vnuerchumbert an allen steten ze versetzen vnd zu verchaufen allen ieren frumen damit ze schaffen wi in daz aller pest fu^egt an all mein vnd meiner vreund hindrung vnd irsal. Ich vorgenanter weygel pin des obgenanten zehenthofz vnd der zehent di dar zu gehorent des obgenanten gotzhaus rechter scherm vnd geber fu^er alle ansprach. Wen ich aygens Insigels nicht enhan so han ich gepeten mein genedigen hern Hern Albrechten von Puechaim den obristen trugsetzen in Oestereich daz er in daz scherm vnd pestet, daz hat er getan durich meiner pet willen. Daz disev vorgeschriben sach Staet vnd vntzebrochen beleib dar vber gib ich dem ob genanten hern dem Probst vnd dem gotzhaus ze Hertzogenwurch disen prief versigelten mit des erbern Hern Hern Albers von Puechaim des obristen druchsetzen in O^estereich anhangundem insigel vnd mit Hern Eberhartz des Hauser insigel vnd mit Hern Andre des fu^eschz ze den zeiten purgraf ze Litschav vnd mit Hern Otten des Pochfuezz insigel ze den zeiten richter ze Teyau di irev insigel an disen prief gehangen haben zu einer barn ganczen gezeugnu^ez der vorgeschriben sach. Daz geschach nach christes gepu^ert drevtzehen hundert iar vnd darnach in dem ain vnd fu^emfzigistem iar an sand Wlrechs tag.

Source Fulltext: FAIGL, Herzogenburg (Wien 1886) S. 198-199